Bastiments novèls, cap-redactritz novèla, jornalista novèl, siti internet tot nuòu lèu en linha, formula que cambia, lo jornal la Setmana es en plena mudason. Ne poidretz lèu veire o legir aquelses cambiaments.
Fanny Lartigot Photo : France 3 Olivier Denoun
Una cap-redactritz novèla
Fanny Lartigot remplaça Clamenç Pech que s’en va trabalhar per Òc-Bi a comptar del primièr de junh. Fanny commencèt lo jornalisme ambe Ràdio País puèi foguèt engajada fa 2 ans coma web-jornalista a la Setmana en plaça d’Aura Séguier. D’idèias per la Setmana, n’en manca pas. Coma per exemple de tornar un pauc a l’origina quand lo jornal aviá bravament de corrièr de legeires. Vòl tanben mai de varietat dialectala ambe de collaborators d’Occitània tota…Sortir un pauc tanben d’una cèrta resèrva jornalistica e far un jornal ambe mai d’engajaments e de punts de vista.
Collaborators novèls
Per remplaçar Fanny, La Setmana fa dintrar Ferriol Macip del Jornalet. Va escriure 4 o 5 articles per cada numèro. Aprigondir benlèu un pauc los papièrs del Jornalet que son sovent escriches per se partajar suls rets socials e far reagir. Un partenariat novèl entre las doas estructuras qu’èra a se madurar dempuèi un briu.
En mai de Ferriol, d’autres collaborators poirián tanben venir dins los jorns a venir. Seràn per la maja part de monde ligats personalament o de per lor mèdia a la FIMÒC (Federacion Interregionau de Mèdias Occitans). Coma per exemple Mathieu Casanova, Jean-Noël Commères, Yves Pédegert, Marius Blénet…
Reportatge : B. Roux O. Denoun J. Levé M. Blasco AL Ruppert MP Fournier
Sites novèls
La Setmana va contunhar d’existir en version numerica, totjorn ambe d’articles que cal pagar e d’autres a gratis. De formulas novèla sd’abonaments seràn prepausadas. Lo site serà mai garnit ambe de sons, de vidèos… Pel moment, la version novèla se pòt pas encara vistalhar pel public mas serà lèu prepausada.
Tre la dintrada, La FIMÒC va tanben porgir una web ràdio pels joves (18-25 ans)
La Setmana totjorn en cèrca d’abonats
Per ara, ne son a 800 abonats. Cò qu’es pas pron per capitar a trobar l’equilibri financièr, n’en calriá un milierat… Pas simple. Cal pas doblidar que La Setmana es pas mai un setmanièr estant que pareis cada 15 jorns… Tòca pas pel momenbt de subvencions de las collectivitats territorialas… L’OPLO a sonque fat passar un parelh de publicitat dins lo jornal.
Cal esperar que totes aquestes cambiaments portaràn tanben un pauc de moneda e mai d’aise per trabalhar.
Lo Benaset @Benoit1Roux
Quand La Setmana e la FIMOC trincan amb lo Jornalet Photo : France 3
