Lo 1èr de junh, Clamenç Pech serà pas mai lo cap-redactor del jornal la Setmana. Va començar un trabalh novèl per l’associacion Òc-Bi. Remplacèt Dàvid Grosclaude al cap del jornal quand foguèt elegit conselhèr regional. Serà pas lo sol cambiament al jornal que va tanben mudar.
Clamenç Pech va trabalhar per Òc-Bi
A comptar del mes de junh Clamenç serà donc encargat de mission per l’associacion Òc-Bi per l’academia d’Occitània. Serà pas complètament copat del jornalisme estant que i aurà quauquas enquistas a far sul terren, encontrar monde… Fa longtemps que trabalhava pel jornal, coma simple jornalista puèi coma cap-redactor en 2010 per remplaçar David Grosclaude elegit coma conselhièr regional. Pas de lassièra de son costat mas una enveja personala de s’investir dins la transmission, dins l’ensenhament… Una seguida logica per el.
Clamenç Pech Photo : Jack levé
Començèt lo mestièr a la ràdio per Ràdio Lengadòc. Faguèt tanben de musica coma selecta tre 1998 ambe Mauresca que n’es un dels fondadors. Daissèt lo grop en 2003 per se consacrar al jornalisme. Quita la ràdio mas vòl ensajar de contunhar son trabalh a Oc-télé.
D’autres cambiaments a La Setmana
De primièr, lo jornal ven de mudar. Son pas mai a Lescar mas si ben tant a Pau, 166 baloard de la Patz. Va caler sustot remplaçar Clamenç e trobar l’equilibri financièr. Es Fanny Lartigot que pren la direccion del jornal.
L’ancian e la novèla cap redactritz de La Setmana. Photo : Jack Levé
Li trabalha dempuèi d’annadas. Son en cèrca d’un jornalista de dialècte lengadocian, mas tanben de cronicaires. Se sètz interessats, podètz escriure a : lasetmana@wanadoo.fr
Ambe la FIMÒC son tanben a estudiar de partenariats. Se parla d’un raprochament amb Lo Jornalet de Ferriol Macip… Va caler far viure La Setmana, lo sol setmanièr occitan.
Lo Benaset @Benoit1Roux
