Han’vol, la primièra escòla de parapenda, es nascuda dins Pirenèus fa 2 ans a Arèta. Exista d’estructuras per aculhir los andicapats mas non pas per lor apréner a volar, quitament solet. L’associacion es nascuda mercés a Hervé Couture, un regent que trabalha al Cap’òc de Pau. La resulta es plan esmoventa e extraordinària.
© association Han’vol
Per de que aquesta mena d’escòla en Val de Baretons ?
Arvei Couture : Per nautres, i a 2 enjòcs. En val de Baretons, i a ja l’experiença d’acuèlh de personas en situacion d’andicap ambe l’associacion « La Pierre Handiski Pyrénées » per far d’eski a l’estacion de La Pierre St Martin. I a un ramelet d’associacions que s’en ocupan. I a tanben una soscadissa globala de las municipalitats que son dins un projècte de pòle regional d’acuèlh adaptat als esports de montanha pels andicapats.
E puèi voliam montar una escòla per andicapats pr’amor de las coneissenças qu’avèm ambe tanben la possibilitat de crear un emplèc. Cò qu’avèm fach dempuèi lo 1èr de decembre passat. Lo Centre Nacional de l’Esport nos acompanha pendent 3 ans per la moneda.
Qu’una amira per l’escòla ?
La tòca maja es de mostrar a tot lo monde que i a pas de diferenças. Dins l’aire, andicap o valide, es la medisha causa. I a una adaptacion de la pedagogia. Nòstra amira : los menar al cap de lor autonomia. En defòra de l’acompanhament, es coma per un estagi de personas valides. Far volar una persona a un còst. Cal comptar 4000 euròs per un valide e 8000 per un andicapat (en causa del còst del fautulh).
Avèm totes coneguts una persona qu’es obligada de demorar asseduda dins un fautur. Lo moral es dificil de gardar. Es per los permetre d’aver un aviéner diferent.
Cossí se passa ?
Fasèm d’estagis sus una setmana. A la fin, son capables de volar acompanhats. Per volar solet, cal comptar au mens una setmana de mai. Per cada estagi, i a sonque 6 estagiaris. Sèm 3 valides per andicapats, e tostemps en ligason ràdio quand son a volar. Avèm un centenat de volontaris per aquò far. N’en còsta 450 euròs.
Quand los vesèm lo primièr jorn puèi lo darrèr quand an capitat de volar, es quicòm d’extraordinari, quicòm que te revira.
La lenga e la cultura occitanas son presentas ?
Dins lo nòstre projèct i a tota la dimension culturala e lingüistica. Per nautres es tanben pendent l’estagi lo moment d’una cantèra o quicèom mai. Lenga e cultura seran presentas. Es important de partajar nòstre tròç de tèrra e çò que fasèm.
Lo Benaset
