Lo collectiu Biarnés que recampa mantunas associacions dels Pirenèus-Atlantics en defòra de tota consideracion politica se prepara per manifestar un còp de mai aquest’aprèp dinnar. Per reclamar mai de mejans per la lenga e la cultura occitanas en Biarn e tot simplament per que l’egalitat republicana siaguèssa respectada rapòrt al tractament del basque.
Tot ara al conselh despartamental. Fòto del collectiu
400 000 € de diferéncia entre la politica lingüistica basca e la per l’occitan en Pirenèus-Atlantics
Dempuèi lo vòte del budgèt lo 27 de mai passat al conselh despartamental, lo colectiu « Tòca’i Se Gausas » a trabalhat e fat los comptes. Deja, entre lo budgèt primitiu de febrièr de 2016 e lo que foguèt votat lo 27 de mai, manca 120 000 € ! Ara, la lenga e la cultura occitanas an pas mai que 814 340 €… Contra 1M245 000 € pel bascoat. Valent a dire que l’egalitat republicana sus un meteis territòri es pas mai respectada. Aquò’s lo sens de la manifestacion pacifica e culturala que se passarà duèi a 5 oras del vèspre davant lo conselh despartamental de Pau. « Pel bascoat, l’afar es clar : i a dos operators, un per la lenga e un per la cultura. Per l’occitan, i a pas de lisibilitat. Cò de cultural es pres sus lo budgèt de la lenga estant que n’i a pas per la cultura », çò ditz Vincens Javaloyès del collectiu.
« Anam demandar als politics basques de prene en carga la politica per l’occitan! »
« Tòca’i se gausas » es en contact ambe los operators basques e s’agís pas solide d’anar a l’encontra de çò que se fa pel basc. « Aval i a un engajament fòrt dels militants e sustot, lo personal politic a pres la lenga e la cultura en consideracion. Cò qu’es pas lo cas ja nautres…Anam demandar als politics basques de prene en carga la politica per l’occitan ! » Simbolicament, Vincens Javaloyès reconeis que se poiriá far. Un pauc de provocacion, coma ambe la bandièra novèla que serà de sortida tot ara davant lo conselh despartamental.
Metre la pression pel vòte del budgèt complementari en setembre
Una segonda comission budgetària se tendrà al mes de setembre estant que tot lo budgèt es pas encara autrejat. Lo parat benlèu de sauvar quauquas situacions malaisidas talas coma la del « Collectiu Ça-i », pichòta estructura amb un sol salariat e 25 000 € de baissa de subvencion… Malaisit tanben pel CAP’ÒC o calandreta mas las estructuras son un pauc pus largas. « Pels operators de transmission de la lenga es quasi criminal ». Vincens Javaloyès e lo collectiu se van donc mobilizar per far restablir un pauc l’equilibri e fa respectar l’egalitat republicana. Una letra es partida per explicar la situacion a cada conselhèr (èra) despartamental(a). Mas dempuèi las manifestacions del 26 e 27 de mai passats, pas cap de responsa de la part de l’institucion maugrat las demandas. Lo programa Iniciativa votat en 2005 a l’unanimitat es clarament en dangièr.
Lo Benaset
