23 Mar

La Ròsa Trobadoresca espelís en Carolina de Nòrd.

Aprèp lo Ròc d’Ercé qu’es a Central Park a New York, la Ròsa s’en va anar florir en Carolina de Nòrd lo 14 d’abrial. La Ròsa Trobadoresca (que vòl dire lo poder del lengatge al temps des trobadors) sortís d’Arièja en 2000 mercés al Nicolas Dedieu. Aqueste musicaire del grope OC apasionat d’istòria vòl montar son pròpre grope de musica anciana occitana. Pren 2 musicaires : Jacques Khoudir (Berbèr Normand) qu’a tocat ambe OC e Gérard Zuchetto e Philippe Groulard (un Ch’ti).

La Ròsa Trobadoresca aficha de la virada a las Americas. © Hervé Julien

La Ròsa Trobadorescaaficha de la virada a las Americas © Hervé Julien

Cornamusa de Puègverd

Lo Nicolas es un tòca tot en cèrca de raissas. E l’edat mejana a gaireben pas de secrets per el. La musica l’interèssa, solide. Coma son grand que li farà tanben passar la lenga. Rabala pels castèls. A Puègverd (Aude) vei aquela representacion d’un musicaire amb una cornamusa. L’afar es complicat. N’en demòra pas grand causa. Urosament, encontra Patrice Bianco un laütièr agenés, especialisat dins las bohas. Mercés an el,  aqueste enstrument desaparegut tòrna préner forma.

Instruments de La Ròsa Trobadoresca © Hervé Julien

Instruments de La Ròsa Trobadoresca © Hervé Julien

Ròsa Trobadoresca

La Ròsa contunha de créisser e Nicolas de completar sa polida colleccion d’instruments a flor e a mesura dels rescontres. Ambe lo Patrice Brient, un Cèlte especialista dels instruments que li far vièla d’arquet, rebec, organistrum, e Ugo Casalonga que li fabrica la cetera de Corsèga la que tòca Nicolas dins lo sicut del JT òc. Òm lo vei sovent ambe OC, tanben ambe Joanda sul platèu de Nagui per La Grande Battle en 2012. Totjorn a furgar de pertot, entend parlar d’un texte en occitan del sègle XIV gravat sus una lausa al castèl de Montreal-de-Sòs (comuna d’Auzat). Ambe son grop, van trabalhar e enregistrar lo texte per far cantar la lausa ! Nicolas s’interèssa als textes de trobadors e fa tanben d’intervencions al castèl de Puègverd. Es aquí e aital, ambe d’escolaris que quauqu’un lo remarca : Rai d’Honoré.

Cap a las Americas

Aquesta dòna, Escossesa, un briat marquisa e doctoranta en istòria de l’edat mejana, lo vòl dins son film. Li demanda 2 tròces dins « Trail of the Trobadors ». Lo documentari vira a las Americas e tanben sus You Tube. Nicolas li demanda alèra se seriá possible de venir parlar de tot aquò e jogar en çò d’ela. E se farà del 14 al 21 d’abrial a l’universitat de Greenville en Carolina de Nòrd amb quitament un concèrt at The Music House lo 19 d’abrial. Se parla ara d’un DVD e d’autras viradas. Un perfum de reconeissença per la Ròsa e un signe fòrt per Nicolas en memòria de son grand. Lo blòg occitan los seguirà aval.

Lo Benaset

Reportatge : B. Roux J. Levé O. Cabanis La Rossèla


Rosa Trobadoresca par france3midipyrenees