Oficialament se sona « Forum Euròregional ». Mas sembla plan l’Estivada de Rodés, portat per de monde e d’estructuras qu’an trabalhat pel festenal rodanenc, sus 3 jorns ambe de musica, teatre, literatura, audiòvisual…Aquò vos ditz pas quicòm? Lo cònse de Rodés nos aviá dich : « Si notre Estivada leur plait pas, ils n’ont qu’à la faire ailleurs! » Semblariá que foguèsse entendut.
Una idèia que tòrna montar a un parelh d’annadas
2014, un projècte de cooperacion entre d’actors culturals de las ancianas regions Lengadòc-Rosselhon Miègjorn-Pirenèus e las totjorn d’actualitat Catalonha e Balearas vei lo jorn. Un afar dins un encastre Euròregional portat mai que mai pel CIRDOC acostumat an aquesta mena de projèctes europencs. Deja l’an passat, l’afar se concretizèt plan ambe de gropes sus l’empont venguts de Catalonha, Balearas, país valencian. E al nòstre micrò, Benjamin Assié del CIRDOC e Patric Roux de l’Estivada nos avián parlat d’un grand forum per 2016. Mas benlèu pas tant crane e amb tant de causas que çò que sembla previst.
Forum Euròregional « Patrimòni e Creacion » a Castelnau d’Arri
Los 1, 2, e 3 de julhet, l’eveniment se tendrà...Quauques jorns de dabans çò que sabètz. Dins lo pre-program que comença de s’escampilhar se parla d’un « forum que s’articularà a l’entorn de grands axes tematics, explorant plan largament l’ensemble del camp cultural occitanò-catalan (patrimòni cultural immaterial, musicas actualas, teatre, numeric, creacion audiòvisuala, literatura…). » Una aisina de socializacion e de soscadissa per la lenga dins la dralha de l’Estivada duscas a ara. Lo Forum es portat pel CIRDOC, « La Fira Mediterrània de Manresa » e « Sa Xerxa de Teatre Infantil i Juvenil de ses Illes Balears« .
Quand òm coneis lo seriós e lo biais d’aquestes organismes e de sas personas, solide que lo Forum serà quicòm de plan interessent e plan dins l’actualitat. Lèva quand mème quauquas questions.
Una contra-Estivada ?
Òm tornarà pas sus las relacions missantas entre la direccion anciana e lo cònse de Rodés. Mas calriá pas qu’una afar mai que mai de personas virèsse dins un afrontament d’estructuras. I a de plaça per tot lo monde e en mai i aurà de festenals occitans en melhor la lenga e la cultura caminaràn. Mas las finanças de las colectivitats son puslèu a demesir. E òm las vei pas sosténer a un nivèl fòrt 2 gròsses eveniments coma aquestes. L’un patirà de l’autre e se sap lo que risca se s’en tirar.
Lo Forum se va far dins l’encastre del Total Festum que a deja son budgèt. Un tal eviniment farà necite de mai de moneda o alèra li calriá préner tot lo budgèt de Total Festum… Se pausa tanben la question del luòc. Cèrtas, Castelnau d’Arri es presque a chaval sus las doas regions ancianas mas òm pòt pas dire que la vila aguèsse fach un fum de causas per l’òc. Me diretz que Rodés a l’epòca tanpauc. Òc-ben, mas èra la volontat d’un cònse convençut : Marc Censi. Lo de Castelnau Patrick Maugard se dís un pauc occitanista. Èra una mena d’elegit referent per la lenga dins lo despartament d’Aude.
Veirem ben. 2016 serà una annada charnièra pels festenals occitans. Lo més de julhet risca l’engana.
Lo Benaset
