La còla de Viure al País vos prepausa un fulheton novèl. Aprèp aver seguit la vida d’una calandreta l’an passat, ongan avèm decidit de viure lo quotidian d’una bòria. Daniel Coutarel e Blandine Bouisset an acceptat de nos dobrir la pòrta de lor Bòria Magra, a la Bessoniá dins Tarn.
A la dintrada de lor bòria, Daniel e Blandine nos desiran la benvenguda en lenga nòstra. Dempuèi mai de 30 ans, trabalhan e vivon aicí amb lors 3 enfants. Photo Sirine Tijani
Daniel s’installèt a La Bessoniá (de Montredond), dins lo Pargue natural regional de Lengadòc Naut, en 1982 per s’ocupar de fedas. A partir de 1987, decidiguèt de passar a l’agricultura biologica e de diversificar sas activitats : crompèt de vacas Aubrac e faguèt de produccion de farinas alimentàrias de blat, de blat negre, de segal e de milh, tot aquò en venda directa sus de mercats, de gropaments de compras e AMAP.
En mai de totas lors activitats agricòlas, Daniel e Blandine asseguran tanben una activitat d’acuèlh amb una aubèrga, mas tanben amb la recepcion de Wwoofer (World Wide Opportunities on Organic Farms) del monde tot. Acompanhan tanben de joves estagiaris dins lors estudis agricòlas e aculhisson d’escòlas, en particular de calandretas : a la Bòria Magra, Daniel e Blandine afichan lor volontat de valorizar e salvagardar la lenga nòstra. Atal, lors mainatges anèron en calandreta e Daniel s’investiguèt fòrça dins la calandreta de Castras e dins lo Carnaval Departamental Occitan dels Dròlles.
A lor costat, abordarem doncas un fum de tèmas e de problematicas : del trabalh agricòla especific de cada sason, a la plaça de l’occitan en passant per la question de la succession e de l’avenidor de la Bòria Magra. Dins lo primièr episòdi difusat dins lo Jornalet del 12 de setembre, Blandine e Daniel nos presentan lor bòria e nos fan cabussar dins lor monde.
Boria Magra par france3midipyrenees
Reportatge de Sirine Tijani, Denis Hémardinquer, Michel Blasco. Montatge : La Rossèla
Dins lo segon episòdi, la paraula es balhada als dròlles de la familha Coutarel : Aline, Germain e Fanette que vòlon pas venir agricultors pel moment mas que son fòrça estacats a la Bòria Magra e i vòlon desvolopar de projèctes.
Bòria Magra – Episòdi 2 par france3midipyrenees
Reportatge Sirine Tijani, Denis Hémardinquer, Michel Blasco. Montatge: Charlotte Willocq
