Estève Clerc quita pas de córrer. Coma professor d’occitan dins 4 establiments del secondari dins Òlt, coma animador de ràdio, fargaire de la calandreta l’Esquiròl de Sent Seren, per donar de corses pels ainats, president de l’associacion Aquí l’Òc, sens oblidar paire de doas calandronas… A tanben participat a la campanada al parat de las eleccions despartamentalas. Se i a ben quauqu’un que se pòt qualificar de militant, es ben el !
Estève Clerc. Fòto : La Dépêche
Tanlèu lançada la calandreta fa 4 ans, a metut en plaça Aquí l’Òc en 2013 una associacion per promòure lo desvolopament de la lenga e de la cultura occitanas dins lo nòrd d’Òlt e sosténer la Calandreta l’Esquiròl. E a calgut se bolegar, vendre libres e CD dins las manifestacions occitanas, organizar seradas de sosten… A cercat totes los que fan causas per la lenga, que la sabon virar. De tot aquò es nascut Escambis, un festenal per metre en abant tot aquel monde e lor far véser que son pas solets. Alèra per aquesta manifestacion, tot lo monde es mobilizat : calandreta, las classas publicas, los corses pels ainats, escrivans locals, artistas. Amb una locomotiva per tirar lo trin d’associacions. L’an passat èra Castanha é Vinovèl, per aquesta segonda edicion mai ambiciosa, i aurà Brotto Lopez lo 23, En Gaouach lo dimenge 24 e los Peiregordins Mena Bruch tre lo divendres 22 amb una jornada dedicada als escolaris.
Lo festenal se debanarà los 22, 23 e 24 de mai sus doas comunas : Sent Seren e Sent Joan de la Ginèsta juste a costat. Li se poidrà discutar ambe los escrivans Sèrgi Gairal e Sèrgi Hirondelle, rire ambe Trabol, fintar de cinema ambe « Lenga d’amor » del Patric Lavaud e ausir un centenat d’escolans dins la lenga. Un festenal dubèrt e convivial de mancar pas. Avèm seguit Estève dins los preparatius darrièrs e a far de reclama sus Decibel Fm, convidat sus CFM aquesta setmana e d’autres medias pel festenal escambis.
