La Ròsa Trobadoresca, una formacion especializada dins la musica anciana s’en tòrna de las Americas. Una setmana de virada en Carolina de Nòrd, 2 concèrts e quitament un At The Music House. Avèm demandat al Nicolau Desvenain cossí tot aquò s’èra passat.
La Ròsa Trobadoresca ambe Rai d’Honoré
Alèra aquesta setmana americana…?
Remirable ! Tot se passèt fòrça plan. Rai d’Honoré nos a demanda de far aquela virada ambe 2 concèrts. Un a l’universitat ont Rai es ensenhaira e un autre at The Music House. Aquí in aviá un fum d’autres musicaires, de totes paises. Quitament una femna d’Arabia Saodita que filmava e nos a demandat de venir far una virada dins son país ! Aviam metut la bandièra ambe la crotz sus l’empont. Aquò interpèla fòrça lo monde. Son venguts nos véser per nos pausar questions sus la lenga, la cultura.
La Ròsa s’aprèsta sul campus
I a un interès aval per aquò ?
Un fum vòlan apréner. Los Americans son interessats pel grèc, coneisson pas la cultura occitana. Mas un còp qu’òm la lor presenta… Ai jogat dins un restaurant japonés ambe de musicaires irlandeses, americans…Ai sortit la cetera de Corsèga e un japones a volgut ne tocar. Es un triomf. M’esperavi pas an aquò ! Vòlan saupre cossí marchan los instruments. Lo monde son plan aimables. Rapidament i a de potonejadas, son contents de véser de Franceses. Pensavi qu’anavem pas tròp plan manjar. E ben non ! En America de Nòrd, avem quitament trobar una mena de milhás coma en Arièja !
Aviás portat de presents ?
Ambe Jaume Khoudir, aviam de pichonas crotz occitanas. Voliam ofrir quicòm a cada persona que nos aduja : crotz, pòrta claus, camisots, pegasolet. Jim, lo patron de l’universitat de Rai èra content de çò que faguèrem. Nos a dit : « Anatz tornar l’an que ven »!
La bandièra es en plaça
E la seguida ?
En setembre, tornarem en Carolina de Nòrd e l’an que ven tanben en California del ponent cap al levant. Deuriam mème cantar al « Kennedy center », quicòm de crane pel cant. Es previst tanben una virada en Russia, al palais de Catarina 2 amb una associacion : » Les Échansons du Carcassès ». I a tanben un projèct de DVD sus Occitània de l’Edat mejana e la religion del trobar, totas las valors, la fabricacion d’instruments ambe de causas pedagogicas… Rai d’Honoré ven en Occitània fin de julhet per aquò far. I a trabalh!
Aqui una video rodada a las Americas. Plan mercés al Nicolau e òsca per la Ròsa Trobadoresca !
Lo Benaset
