28 Sep

La Dintrada fa sas classas

L’iniciativa es interessanta : organizar un eveniment per soscar a las accions politicas en general o a de causas particularas, permetre al monde occitan de s’encontrar e de se parlar. Un quicòm de puslèu rare e que fa mestièr. La segonda DINTRADA se passèt donc a Pòrt-Leucate la dimenjada passada. Es encara en mòde d’aprendissatge, fa sas classas mas l’escolan Dintrada s’amerita los encorajaments.

 

Drecha extrèma, centralisme dins los transpòrts e eleccions

Un centenat de personas venguèron donc los 24 e 25 de setembre per participar a la Dintrada. Un pauc mens que l’an passat, pas tant variat tanben dins lo public. L’afar es organizat pel Partit Occitan e l’Aligança Liura Europenca mas la manifestacion se vòl dubèrta e mai del tèrç dels participants èran pas ligats al POC. Per la segonda edicion, lo tempò èra un pauc pus viu, los debats cadrats e las intervencions mai cibladas. Se parlèt de la drecha-extrèma que fa flòri en país occitan coma de pertot. L’intervencion de Gerard Tautil permetèt de far una mena de bilanç de las vilas governadas pel FN e los dangièrs qu’aquò representa.

Debat sus la drecha extrèma. Fòto Thérèse de Boissezon

Debat sus la drecha extrèma. Fòto Thérèse de Boissezon

Venguèt puèi la question del centralisme dins los transpòrts amb Eric Boisseau que reprensatava un organisme (la FNAUT Federacion Nacionala de las Associacions dels Usatgièrs dels Transpòrts ) que vòl promòure los transpòrts regionals. Una alternativa als projèctes grandasses de linhas novèlas e que còstan un fum de moneda. Una autra via es possibla !

Costat eleccions, aprèp las regionalas de l’an passat, lo periòd es ara presidencial. Christian Troadec, candidat declarat a l’Elisèia, sostengut per Regions e Pòples Solidaris venguèt per parlar de son projèct e de sas idèias  e escambiar ambe lo Public.

Los sostens al Christian Troadec. Fòto : Thérèse de Boissezon

Los sostens al Christian Troadec. Fòto : Thérèse de Boissezon

Dins un esperit de dubertura e d’alargament, François Alfonsi per Corsèga e Ana Miranda per Galícia venguèron fa profitar de lors experienças sus d’autres territòris.

L’esperit e los enjòcs de la Dintrada

I bravament de personas que s’interèssan a la politica e que vòlon pas s’engajar dins un partit o un organisme. La Dintrada es donc una universitat dubèrta e pas reservada als militants. Aquest’an semblariá que la diversitat èra pas tant fòrta coma l’an passat. Benlèu mens de monde ligats a d’autres moviments d’esquèrra. Mas n’en demòra pas mens que cadun pòt venir, prene un pauc de temps per escambiar s’assabentar, trabalhar amassa. Per aquò far, i a de debats un pauc estructurats mas tanben de moments de partatge al moment de dinnar, pendent la serada del dissabte o la pausa cafè.

Renaud Savy respondèt a las questions de Sirine Tijani. Reportatge : V. Beaulieu E. Auriaux J. Eon E. Leroy MP. Fournier

La Dintrada par france3midipyrenees

L’avenidor

Patric Roux, lo sol elegit occitan regional venguèt tanben per parlar de sa primièra annada coma conselhièr regional. Tornèt sus la creacion de L’Ofici Public per la Lenga Occitana e las avançadas que se podrián far ambe l’espandida de la novèla region.

Dimenge de matin, se parlèt coma l’an passat dels malhums socials. Lo Renaud Savy presentèt los utisses e los biaisses. Aprèp Facebook, plaça aqueste còp a Twitter. « Aquelses utisses son importants per nautres estant que avèm quasi jamai de plaça dins los medias tradicionals, fòra dels occitans. Fargar de gropes occitans un pauc activistas foguèt pron eficaç per las regionalas. Es un pauc l’orientacion del POC dempuèi dos o tres ans » , nos dís Guilhèm Latrubesse.

Fòto : Thérèse de Boissezon

Fòto : Thérèse de Boissezon

Per el, la formula de la Dintrada agrada, d’unes qu’èran aquí l’an passat son tornats, los intervenents son bons, los escambis rics, lo luòc agradiu… Voldriá pr’aquò « tocar mai de monde, dubrir encara mai, per de que pas a Catalonha… E que i aguèsse mai de mediatisacion ! » Un questionari de satisfaccion va virar per afustar un apuc l’analisi mas sembla solide : La Dintrada redoblarà… de fòrças en  2017 e se farà ben !

@Benoit1Roux