Mai de 20 ans d’existéncia per tractar l’actualitat occitana dins totes los dialèctes, lo sol setmanièr occitan La Setmana es tojorn menaçat. Per adujar la cooperativa Vistedit que compta tanben autres 2 jornals, se farà una serada de sosten lo dissabte 24 de seteme au complèxe Victor Hugo de Lescar.
La Setmana totjorn en perilh
E se « La Setmana desapareis? » Aquí çò que se podiá legir a la una del jornal fa gaireben presqu’un an…
Quauques meses pus tard, la question es ailàs d’actualitat. A mai una rampelada per alertar e trobar de mejan, amai lo relai dins la prèmsa, la SCOP Vistedit se tròba dins una situacion malaisida. An capitat per trapar 120 abonats de mai (gaireben 800 en tot) mas aquò sufís pas per contunhar de viure. Lo jornal La Setmana es un pauc la veirina, lo product d’apèl de la SCOP. Mas i a tanben Plumalhon e Papagai, doas revistas pels mainatages. Aquò tot lo grop qu’es menaçat, e los 4 emplècs que li son ligats. Una situacion que pòt pas durar e que tòca tanben la prèmsa occitana dins son entièr.
Tota la prèmsa occitana que patís
Òm sap que lo Jornalet a de dificultats, que son fondador e collaborator màger Ferriol Macip arriba pas a ne sortir un salari per el. A calgut montar una Societat dels amics del Jornalet per contunhar las activitats. Mèma causa per Aquò d’Aquí menat pel Michel Neumuller. Aquest’estiu, cercava 300 abonats de mai. L’afar sembla plan partit estant que 200 se son manifestats… Es totjorn adujat per la region PACA mas la subvencion baissèt de 7 000€ ! La Setmana tòca pas cap de subvencions de las collectivitats e « aquò’s pas d’actualitat » segond Clamenç Pech son cap redactor. Lo siti internet prepausarà lèu una formula novèla, abans la fin de l’an. « Lo numeric nos servís de teaser per l’edicion papièr qu’es pas condemnada. Entre los dos i a una mena de coabitacion pacifica ! Sèm a estudiar de publicitats pagantas sul siti ». Mas aquò sufirà pas per èsser en capacitat de contunhar.
Serada de sosten del 24 de setembre
Dissabte que ven, la Federacion Interregionala dels Mèdias Occitans (FIMÒC) organiza donc ambe La Setmana serada de sosten. A comptar de 7 oras del ser, un aperitiu cantèra al complèxe Victor Hugo de Lescar (64) la vila ont la SCOP es establida. 3 gropes an dit de òc per far pordèl. Los Seuvetons, un grop de La Seuva (64) montat al mièg de las annadas 80 e que prepausa un espectacle novèl « Arcolin ».
Lo parelh Base Duo Didier Oliver e Joaquim Montbord que fan de musica gascona e d’endacòm mai, enfin Espartenhas un quatuòr de musicas vengudas de Gasconha, Portugal, Itàlia…
Fòto : Facebook del grop
De que dançar e tanben manjar (sus reservacion abans la fin de dimenjada). Un bon moment plen de calor e de convivéncia. 20 € per tot aquò e sustot una bona accion per que contunhe de viure la prèmsa occitana. Un gèste de solidaritat que n’espèra un autre : s’abonar !
Lo Benaset @Benoit1Roux
