LA DINTRADA : 5 bonas rasons (e mai) per pensar Occitània ! - Le blog de l’occitan / Lo blòg occitan

Los 24 e 25 de setembre, lo Partit Occitan e l’Aliança Liura Europenca tòrnan organizar un moment d’escambis, de debats e de soscadissas per pensar Occitània. L’universitat es dubèrta a tot lo monde e se debanarà a Pòrt-Leucata dins Aude. Avèm demandat als organizadors de nos trobar 5 bonas rasons per i anar. E avèm imaginat 5 bonas-falsas rasons encara.

5 bonas rasons per i anar

L’edicion 2015 foguèc un succès : Fòrça dels 150 participants o diguèron. Se tornam prene las conclusions que faguèt lo conselhèr regional en region Occitanie, Patric Roux : “Sens tornar aquí suls debats, la qualitat e l’extrèma assiduitat dels participant-as, la qualitat e la fraternitat dels escambis (dedins e defòra) an tanben constituit un element de mençonar (…) La Dintrada foncionèt perque s’es trobada naturalament en fasa amb çò que totas e tots les militants de l’occitanisme ressentissián : le besonh de confrontar nòstres fondaments amb la realitat de nòstre environament, la realitat de la crisi politica, culturala, environamentala que tresvira a granda vitessa lo pensament, les mitjans e las capacitats d’accion. »
Fòto : Thérèse de Boissezon
Vendrà un candidat a l’eleccion presidenciala ! Òc , un candidat a l’eleccion presidenciala representarà la majoritat dels partits autonomistas, regionalistas e federalistas de França. Christian Troadec, sostengut per la federacion de partits “Regions e Pòbles Solidaris”, vòl far dintrar las questions de la decentralisacion dins le debat.
Christian Troadec e François Alfonsi
Le dinar es ofèrt ! La participacion a la jornada del dissabte es a gratis, coma le dinar. Vos demorarà sonqu’a trapar un coveituratge per venir per pas tròp car. Per aquelis que vòlon demorar un pauc mai, la serada del dissabte serà una autra escasença de viure un moment convivial.
Fòto : Thérèse de Boissezon
Encontrar les responsables ! L’editò le rampèla : “quitament se totas las taulas redondas son pas suls subjèctes polemics mai estimats dels occitanistas, los poiretz metre sus la taula al moment de l’aperitiu o a la pausa del cafè ! Avèm invitat les elegits occitans a expausar lor trabalh.”
Fòto : Thérèse de Boissezon
Se farà mai que de charrar : l’edicion de 2015 permetèt de téisser de relacions amb de personalitats que conéissian pas las questions occitanistas. Tanben, es una escasença rara de trapar las ressorgas umanas per vòstres projèctes occitans. Passatge a l’accion concrèta le dimenge : de talhièrs pagmatics son prepausats per mediatizar las vòstras revendicacions suls malhums socials e per participar activament a l’eleccion presidenciala.
En bònus… : L’encastre ne val la pena ! La Dintrada se debana a Pòrt-Leucata entre la plaja e le pòrt, òm pòt quitament vèire la mar dempuèi le luòc ! E se quicòm vos tarufa o vos enuèja, una cabuçada dins l’aiga vos farà tornar le vam e l’enveja.
5 falsas bonas rasons d’i venir tanben, ligadas a l’actualitat