A l’edat-mejana, un sirventés èra un genre poetic dels trobadors que permetiá de parlar mai que mai de politica e d’actualitat. Sirventés es tanben lo nom causit per Bernat Giacomo quand montèt l’agéncia de desvelopament artistic ont se tròban duèi La Mal Coiffée, Du Bartàs, Dje Balèti e tanben un ramelet de contaires. Establida a Orlhac dins Cantal, Sirventés festeja los 20 ans a comptar de duèi. 20 ans a promòure d’artistas mas tanben a menar d’accions de desvelopament de territòris. Bernat Giacomo tòrna sus la riquesa e l’anar de Sirventés.
Bernat Giacomo, Sirventés qu’es aquò ?
Partiguèt sus una dobla idèia : lo desvelopament d’artistas e lo desvelopament dels territòris en s’apiejant sul patrimòni. Trabalhavi coma engeniaire al Ministèri de l’agricultura. Èri tanben militant occitanistas al dintre de l’IEO de Cantal. Es aital qu’avèm creat las « Rapatonadas », un festenal de Conte tre 1981. Ai desvelopat d’animacions un pauc de pertot e ai una coneissença del terren per adujar. En 96, quitèri donc lo Ministèri per fondar Sirventés.
Qual i aviá coma artistas a la debuta ?
Ieu foguèri elevat al Marti. Avèm ajut Jan-Maria Carlotti, Andrieu Ricros, Jan dau Melhau, Bernat Combi, Bernat Cauhapé, Alan Bruel lo cantalés e La Fabrica ont se trovava lo Laurens Cavalié de Du Bartas. La question de la professionalisacion se pausèt tre la debuta. Per ieu es fòrça important. Foguèt un pauc complicat a la debuta, quitament al dintre de la nòstra estructura. Aviam d’emplècs ajudats e podiam pas bastir quicòm de solide. En 2004, sèm passat a quicòm de mai pro, en fidelisant lo monde.
Sirventés fofuèt una SCOP tre la debuta ?
Non pas! Una associacion per començar. Puèi encara una autra associacion en 2000 e la Scop arribèt pas qu’en 2009. Aviam pas de formacion aquí dessus. Descobriguèrem tot. A calgut montar una còla perèna. Lo budgèt vira ara entre entre 550 000 e 700 000 € en fonccion dels eveniments.
Quantes sètz duèi ?
6 personas sus l’artistic. Per acompanhar los artistas, cercar de datas, sègre la fabricacion, organizar de viradas sus un plan material, far la comptabilitat, los contractes. Ieu m’ocupi de la gestion d’eveniments, doni de conselhs per acompanhar de projèctes de territòri. Es quicòm mai…
Justament, es una causa pas tròp coneguda de Sirventés. A de que consista ?
Ai acompanhat mai d’un centenat d’eveniment de pertot. Coneissi plan los territòris en avent trabalhat al ministèri de l’agricultura. Ai començat sus mas tèrras ambe las Rapatonadas, la fièira de la Castanha de Morjou en 90 ont lo monde me disián : « ah, oc-ben, de folclòr! ». Non pas de folclòr mas d’economia! Quand òm vei son succés duèi e çò qu’a permetut de tornar lançar… La fièira del Palhàs a Massiac (Cantal) a l’entorn de la frucha que serà a l’onor aquesta dimenjada per l’anniversari. Ara se fa lo vin de palhàs que s’en va de pertot en França. Es a l’encòp un eveniment per comunicar sus las especificitats d’un territòri e tanben per i associar la lenga. O encara la Mangona (es aital que se dís la tua del pòrc dins Cantal) a Laroquebrou. Ai l’abituda de dirijar de còlas. Ai conselhat per un acuèlh paisan en Ròse-Aups, una deisheria a Belle-Île-en-Mer Belle Ile en mer, quicòm a l’entorn d’una ribièra dins l’Allier…
Una activitat que fasètz encara duèi ?
Vertat es que s’es un pauc atudada, en sòm. Vau far un autre siti per aquò. Mas ieu m’en vau a la retirada a la fin de l’an. A l’AG del més de junh va caler trobar una autre president !
Sètz content del camin complit ?
Avèm de gropes que donan enveja ! I a plen de gropes pichons que vòlan cantar del biais de la Mal Coiffée. Un còp Joël Mespoulède que se maina de las viradas èra a Cardiff e un tipe lo venguèt interpelar : « digatz, se passa causas ja vautres los Occitans! ». Te pensas, un Irlandés!
Cossí marcha per l’artistic?
Cada artista fa sa pròpra direccion, intervenèm pas. Aprèp, Sirventés fa la gestion de tot : Sirventés encaissa e puèi fasem lo salari de l’artista. Fasèm lo 360° : lo torn de tot ! Al nivèl de la produccion de CD, las condicions son las memas per totes. En virada lo cachet entre los uns e los autres cambia pas tròp. Avèm 9-10 entitats artisticas pel cant e n’en caldriá maitas…
Es aisit de dintrar a Sirventés ?
Per dintrar, avèm una commission que se recampa. Avèm pas mal de prepausicions mas pas tròp sovent professionalas e per nautres es essencial. Aprèp, volèm de diversitat. Avèm La Mal Coiffée, Du Bartàs, Djé Balèti e de contaires coma Yves Durant et Florant Mercadier. Avèm pas grand causa d’Auvèrnha. Aimariái tanben mai de musicas actualas, de ragga…
Aviatz Mauresca que li son pas mai ?
Vertat. Cercavan sustot d’adujas per virar. Mas per nautres, signar a Sirventés es plan mai qu’aquò. L’artista se diu investir. Avèm trabalhat ensemble e l’afar contunhèt pas.
Bon ben alèra, bonas fèstas dels 20 ans! Viure al país farà un reportatge la setmana que ven.
Lo Benaset
Du Bartàs Dissabte 14 de mai al Teatre d’Orlhac
