Hestiv’òc, un festenal complèt

Del 18 al 21 d’agost, se tendrà la dotzena edicion de la hestejada occitana. Hestiv’òc aquò’s 4 jorns de cultura festiva o intima, d’artistas professionals coma amators, un festenal en Biarn que se dubrís als autres. Li se trobarà d’artistas confirmats, de descobèrtas, una creacion amb una salça 70 del cent occitana e 30 del cent d’autras culturas atenentas. Didier Fois son creator e totjorn director a plan volgut nos en dire un pauc mai.

 

Un còp de mai, òm pòt dire qu’Hestiv’òc es un festenal complèt ?

Es coma aquò dempuèi la debuta. Avèm de tot : de musica, de teatre, un pauc de literatura, de cinéma… Es a l’encòp de cultura « plaser » que l’òm receu e que se tasta de tira e de causas per bastir quicòm, pausar de pèiras. Nos cal encoratjar los artistas, musicaires, comedians, realizadors e per aquò cal de difusion. Es per aquò qu’avèm creat los primièrs rescontres de cinéma a Salias en 2011. Duèi, i a lo festenal Clap de lenga que se fa en defòra d’Hestiv’òc (se farà en novembre a Arudy) mas tre lo dimècres 17 i aurà un film e un autre lo dijòus a quauquas menutas de la dubèrtura oficiala.

E per las autras arts coma la literatura…?

Aviam creat los « rescontres literaris deu 2 ponents » mas se fa pas mai. La literatura es sonque presenta suls taulèrs. Mas avem un « Espaci joinessa » lo divendres e dimenge aprèp-mièjorns que s’adreiça prencipalament a los que coneisson pas nòstra cultura. I a de descobèrtas, de contes, una inciacion a las danças que s’acaba per un bal. L’art es tanben per carrèra ambe las fanfaras que son pas briga occitanas, la tamborrada dempuèi 2014 lo dissabte de matin… Mas vertat es que i a pas de deambulacions coma a la debuta per carrièra. Aquò pausava problèma. De comerçants se planguèron. Ara, es un rendètz-vos a un endret. Per exemple l’Humani Teatre qu’èra vengut fa 4 ans e que nos va far una version d’Electre al mièch de la fola…

Pas tròp de teatre quand mème ?

Es pas aisit pel teatre en causa de la lenga. Aquò passa per la musica mas pel teatre, se comprenes pas, desarapas. La Rampa ven pel primièr còp ambe lo Boçut per aquesta rason de compreneson d’un autre dialècte. Mas avèm Los Comelodians que venon regularament, enquèra aquest’an lo 21 d’agost.

Cossí se passa la programacion ?

Diriái que cal un bon artista al bon endret e a la bona ora ! Cal de tot monde, e meti ieu tant d’importància als amators qu’als professionals. E cal de totes los genres : de polifonias, de world, de jazz coma per exemple ambe lo Trio Savignoni que fasem venir scèna Margot, de punk ska, causas per far las fèstas, d’autras mai intimas coma Las Gojatas. Amb un bal cada ser. La granda basa es biarnesa e occitana mas i a tanben las culturas pròchas coma lo bascoat o la de Galícia ambe Chotokoeu.

I a de creacions ?

Oc-ben ! « La nuit d’encontre » n’es una, ambe d’occitan, de bascoat, corse, creòl , sieis lengas e cultura en tot. Es una demanda de Jean-François Laffite qu’es lo director des Voix du Sud, l’estructura de Francis Cabrel…

Es lo primièr còp que trabalhatz ambe Voix du Sud ?

Oc. D’abituda Voix du Sud èra partenari de l’Estivada de Rodez. Aquest’an son ambe nautres per aquesta creacion qu’es quicòm d’inter regional. Serà lo parat de descobrir una cantaira jova de 21 ans Coralie Nazabal qu’èra venguda l’an passat ambe son grop La Maison Dakoté. Son univers es un pauc lo de Barbara e de las cançons a textes.

 

I a tanben lo rescontre Le bal Brotto-Lopez ambe los Ogres de Barback ?

Aquò’s pas una creacion. Es un projèct de Guilhèm Lopez amb Sam Burguière. An participat a mantunas causas amassa e volián far quicòm sus quauquas datas e aquò nos a interessat. Mas cresi qu’es lo primièr còp que metèm autant d’argent sus un espectacle. Mas ne val la pena. Cal dire que los Ogres de Barback viran de pertot.

Un còp de còr ?

Justament, me triga de véser Brotto-Lopez ambe los Ogres. Aimi fòrça los 2 univèrses. L’autre còp de còr es lo basc Kepa Junkera & Sorginak. Fa 35 ans que Kepa vira. Es un musicaire de tria e un òme fòrça amistós. Mas poiriái tanben parlar de las Catalanas De Calaix o dels Lemosins San Salvador.

DE CALAIX – Nosaltres decidim from De Calaix on Vimeo.

Es donc un festenal de pertot en vila e per totes los publics?

Lo festenal es plan esperat cada an. N’i a que convidan la familha, los amics per lo festenal. Quitament la messa…Al debut tot lo monde me disiá que marchariá pas. Fin finala dins la glèisa Sant Martin avèm a cada còp entre 800 e 1000 personas. Talament plan que dempuèi l’an passat, la securitat vòl que las plaças son limitadas ara a 500 personas. Aquí, ensajam de prepausar de causas per totes los publics e de moments de partatges coma ambe la Cantèra de dubertura.

Darrèira causa : pas tròp malaisit costat budgèt ?

Lo budgèt es lo meteis que l’an passat, a l’entorn de 355 000 €. Es la comunautat d’aglò de Pau que dona lo mai, puèi lo Conselh Despartamental e enfin la region. Representa 58 del cent del budgèt. Lo demai ven de partenaris privats e de l’autò-finançament ambe las beugudas e la botiga. mas vertat es que ven de mai en mai malaisit. Ensajam de manténguer lo nivèl.

Lo Benaset