Dins un comunicat en data del 2 de març, l’IEO interpèla l’ensemble dels elegits -e de primièr los Presidents de las 4 regions occitanas novèlas- per demandar una reconeissença , mercés a una declaracion particulara, de la lor apartenéncia a un ensemble mei bèl, que s’apèla Occitània. E l’IEO de far passar son eslogan : « Occitània es 4 regions ». Pas un pausicionament dirèct sus lo nom que poiriá prene la region novèla Lengadòc-Rosselhon Miègjorn-Pirenèus, mas un biais d’afortir son ròtle de federacion de tot l’espaci occitan. Lo comunicat fa quand meme debat en LRMP.
Un corrièr als elegits regionals
Abans las eleccions regionalas e quitament al moment de la crida de Montpelhièr, l’IEO mandèt un corrièr als candidats. Ven de far de mème als elegits de las 4 regions occitanas : Lengadòc-Rosselhon Miègjorn-Pirenèus, Provença-Aups-Còsta d’Azur, Aquitania Peitau-Charantas Lemosin, Auvèrnha Ròse-Aups. Totes an recebut una letra e la brocadura « L’Occitan qu’es aquò ? » Un comunicat per explicar çò qu’es Occitània e anar cap a mai de politicas entre las regions sus aquesta question de la lenga e de la cultura. An recebut quauquas responsas mas pas cap d’engajament per ara dels 4 presidents : Carole Delga, Alain Rousset, Laurent Wauquiez e Christian Estrosi. Lor van benlèu prepausar tanben un texte per far adoptar. Mas l’IEO vòl pas s’engatjar directament sul nom de la region LRMP, la sola ont Occtània poiriá figurar. Son director Laurenç Gòsset qu’avèm sonat duèi de matin nos a donat quauquas precisions.
Sul nom de la region LRMP : pas « Occitània » solet
L’IEO participèt pas fa un an al collòqui sus la fusion de las regions a Tolosa, ni mai als acamps per discutir del nom organizats dempuèi per Païs Nòstre e Convergéncia Occitana. Las aficas « Notre région c’est l’Occitanie » faguèron sortir l’IEO de sa resèrva. Alèra lo comunicat « Occitània, es 4 regions » sona un pauc coma un avertiment. L’IEO es pas tanpauc representat dins lo « Comitat del Nom de la Region » que ven de se metre en plaça en LRMP, alèra que i a al mens 3 personas conegudas coma occitanas.
Laurenç Gosset nos dís que i a ben un debat en intèrn sus l’utilizacion del nom d’Occitània. L’IEO vòl pas qu’Occitània siague utilizat solet mas « l’ajustament d’una qualificacion seriá compatibla se designa explicitament una partida de l’espaci occitan » segon son director. Mas i aurà pas de causida sus un nom en particular. L’IEO compta quicòm coma 2 000 membres; la mitat son en Miègjorn-Pirenèus Lengadòc-Rosselhon. L’afar del nom es donc pas anecdotic.
Ara, l’IEO va prene lenga amb aqueste « Comitat del Nom » e se consacrar a de trabalhs jujats « mai utiles » tals coma d’accions interregionalas sus la petita enfança o encara las revendicacions de portar per las eleccions de 2017.
Lo Benaset
