23 Jan

Biais amb lo Guilhèm e lo Dominique : torrilh de rabas e coja

Viure al País – Amb lo Guilhem e lo Dominique pel Causse de Gramat
Produit par Piget

Las causas simplas son, de còps que i a, pas tant simplas qu’aquò, e de las melhoras. Biais permet de s’en trachar e de metre dins lo lums de causas e de monde puslèu resconduts. Càquela, se jamai demandatz an aqueste monde de vos far véser aquel tresaur, son los primièrs a s’estonar e de vos dire que francament, veson pas l’interès de far conéisser tot aquò. Modèstes, pas acostumats a se conflar lo pitre.

Lo biais per de monde que l’an

La fòrca de Biais es aquí : anar al rescontre d’una persona, d’un territòri e de totes los biaisses que van ambe. Ensajar de filmar lo gèste, lo pichon d’aquò que fa que la causa simpla ven extraordinaria. Aquel monde son cargats de coneissenças, de causas que son dins lor cap, dins lo còr o encara las tripas. S’en trachan quitament pas pus. Son de causas que fan cada jorn, naturalament. Alèra òc-ben, avèm d’astre de poder agachar tot aquò, de lo comprene per lo tornar far. Dins aqueste periòd ont nos cal de coach e de « tuto » siquenon nos sembla que sèm perduts, avèm aquí plan mai qu’un paissèl. E coma los images son remirables, intim sens genar lo monde, quand se fa de cosina vos fan venir l’estomac darrèr l’esquina !

Dominique e Guilhèm

Aqueste còp, sèm partits pel causse de Gramat, dins lo rajal dels funses. Un paire e son enfans nos espèran. Òm ne profita per aprene de causas pel l’òrt ambe Dominique, cossí empachar las milhaucas de venir per l’ensalada… Per la cosina, Guilhèm comença per aprestar lo cotèl amb un viralenga per l’asugar : « De carn, de farç, de lat » ! Qu’una polida lenga Guilhèm ! Mas sèm pas aquí per far un cors de lenga. Al programa : torrilh de rabas e cojat.

TORRILH DE RABAS

De rabas de per l’òrt que cal palar espés e talhonar plan teunas. Vojar aquò dins una ola a fricassar dins de grais o d’òli d’oliu. De salt, de pebre e remenar pron sovent.

Ajustar dos culhèrs de farina e d’aiga plan cauda per pas far de grumèls.

Còire pendent 1 ora.

Far de trempas ambe de pan de torta un pauc vièlh e sec. Un pauc d’alh, de pebre.

Metre de bolhan (sens tròp de rabas) per acatar las trempas e daissar 4-5 menutas

Al moment de servir, ajustar lo bolhon que cal.

LO COJAT

Cal prene de cojas de per l’òrt plan maduras. Las palar per ne gardar 1Kg.

Las còire dins l’aiga 1/4 d’ora

D’aquel temps podètz far la pasta. Dins un plat, metre 250 g (a vista de nas!) de farina, ambe 4 uòus, de lat, un pesuc de salt e un rajal d’aigardent de pruna.

Estorar los tròçes de coja. Ajustar 250 g de sucre. Mesclar tot aquò ambe la preparacion e la metre dins un plat burrat.

Coire 45-50 menutas dins un forn a 180°C.

Simple me diretz?! Quand sètz biaissuts, tot es pron simple! Bon apetit ! E mercés Piget, Lila e Amic.

Lo Benaset

BIAIS : coproduccion France Télévisions et PIGET

 

BIAIS N°8 : Amb lo Guilhem e lo Dominique pel… par france3midipyrenees