23 Fév

Alidé Sans dins son paradís

L’aviam daissada fa un an a Tolosa per un concèrt a la fac Jean-Jaurès e a l’Ostal d’Occitània. Plens d’estrambòrd e a l’espèra de son disc novèl e primièr. Se parlava de setembre…Puèi de febrièr… La sèm anada véser a Pau ont buta d’estudis. Va caler esperar encara un pauc.

Es totjorn un pauc piòt e reductor de situar quauqu’un rapòrt a son paire, sa maire, son atge. L’anam far sul pic, per èsser tranquils : òc-ben, a 21 ans, es la filha de la cantaira aranesa Lucia e de Jusèp Loís Sans Socasau que se maina de politica lingüistica. Aildé vòl pas d’etiqueta, se far embarrar dins un tirador, e a plan rason. Son cant es liure, son repertòri variat, fach d’espontaneitat e d’emocions. Son estil jòga sus aquò, amb una votz qu’a un pichòt gran de particular, d’aise dins la tecnica sens aver pres de corses de cant, ambe sovent d’onomatopèias. Òm pensa a Sanne Putseys alias Selah Sue per aquel biais, un pauc lo fisic tanben, a Nneka, Ayo… Mas aquò’s Alidé, tot simplament. Son univèrs es pron diferent quand tòca piano, guitarra, acordeon.

Ven tot juste del festenal Barnasants de Barcelona. Toquèt lo 8 de febrièr a l’Harlem Jazz Club davant mai de 100 personas, ambe sonses musicaires. Deviá presentar son disc mas… Dedins, 12 cançons qu’a escrichas e compausadas. Amb un bon ramelet de causas intimas, de còps que i a fantasticas, engajadas tanben. Lo disc es totjorn a l’espèra. Seriá un problèma de livròt que vòl daissar sonque en aranés e non pas revirar… Alèra n’avèm parlat un pauc.

Alidé Sans par france3midipyrenees

 E l’avèm enregistrada amb son acordeon sul baloard de las Pirenèias. « Pirata de Montanha » o l’istòria d’un òme -pas vertadièrament pirata- que tròba son paradís interior. Alidé cantaira e contaira.

Pirata de Montanha par france3midipyrenees

Puèi, pas plan luènh de la fac, a la Centrifugeuse de Pau, entre dos corses de drech, que n’es a la quatrena annada. »Mònstres », cançon engajada sul monde de l’endefòra ont vivèm.

Per vos far despacientar del disc « Eth paradís ei en tu », Alidé serà a Tolosa lo 4 d’abrial. Se parla tanben de l’Estivada de Rodés…

Lo Benaset

Monstres par france3midipyrenees