Un dissabte de ser a l’Estanquet de Tolosa. Al menut : Ministèri del Riddim…
« Deux enfants de l’immigration vont vous faire une chanson en occitan ! »
© Photo : Antoine Pierron
Lo public apròva, brama, geta de crits e se daissa menar de bon grat per lor univèrs pimentat. Se dison Mourad e Hocine, sortisson respectivament de Ònes del Castèl (Avairon) e Masamet (Tarn). Son estats breçolats a braves còps de hip hop, reggae e bal trad. Es a l’escasença d’una serrada ragga balèti a l’Estanquet de la Portièra en 2010 que lors camins se crosèron. Sens trentalhar se reivindican de Massilia Sound System, Fabulous Troubadors e mai estonant del Renat Durand (Novèl Optic ).
L’istoria del Ministèri se commencèt en 2009, foguèt un collectiu d’artistas a geometria variabla qu’organisèt de seradas ragga balèti a Tolosa. Devenguèt lo grop que coneissèm uèi cap a 2012. Son pas de novicis, Mourad es un dels fondators de « Bush Doctors » lo primier grop reggae d’Avairon a la fin de las annadas 90. Activista cultural e reponsable associatiu, foguèt quitament conselhièr municipal de sa vila mairala (2000-2003). Es tanben lo cantaire de « Mouradikal Roots Band » dempuei 7 ans. Lo Roergat de la còla se remembra de Renat Durand coma lo primièr occitan qu’es vengut lo querre dins son barri per li prepausar de far « quicòm de different ». L’aventura s’acabèt per un concèrt memorable e un «Sèm montanhòls» d’antologia per la Fèsta de l’Huma de 2001 a la Courneuve.
Ministèri Del Riddim en public als Dock Des Suds
Hocine es un barrutlaire musical. Dempuèi las annadas 90 e son primièr grop « Le Syndic de Mazamet », camina micrò a la man sul la palanca entre cant tradicional e rub a dub. Sus l’empont partejava lo micrò amb d’artistas tant diferents coma lo grop fondador del raggamufin francés Saï Saï, los pilars de la scèna electro-dub, Improvisator Dub, o de grands noms de la musica tradicionala occitana coma La Talvera e Claudi Romero… Afogat de la pluralitat culturala, te pòt cantar en ragga un tèxte de Raimond de Miraval, o mesclar per una canson d’aires populars occitans e berbèrs. Mestresa plan lo folclòr occitan, es estat iniciat per de monde coma Daniel Loddo, Claude Sicre e Manu Theron. A pausat sos primièrs « lyrics » sus l’empont ambe Massilia Sound System, aviá pas que 17 ans !
© Photo : Antoine Pierron
La lor recèpta es simpla e eficaça : riddims del biais jamaican (mandats pel Dj Mayday), tèxtes inspirats de lor percors, de la lor realitat e de rescontres, cantats dins una mèscla subtila de lengas que fan lor quotidian (francés, arab , berbèr e occitan). Sense oblidar una bona dòsa d’improvizacion e d’umor !
Los repics s’escason e lo public tòrna cantar a l’unisson. Aici òm parla pas pus de concèrt o de sound system, mas d’un vertadièr moment de paratge e convivéncia. Òm canta, òm dansa, òm s’espeta de rire … e òm s’en tòrna regaudit !
Aqueles dos trobadors tenon lo remèdi contra la morositat. Lor crit de guèrra : « Harissa ! »
Ministèri del Riddim en concert a l’Escura d’Albigès lo 22 de novembre.
Guillaume Gratiolet
