La botiga Macarel de Tolosa es tampada dempuèi lo 4 de genièr. Va tornar dubrir d’aici un bon parelh de meses, benlèu pas al mème endret, mas totjorn carrièra del Taure.
La resulta es bona
Danis Cantornet es un òme urós. L’òme de Nadal i a fat un present polit : la certesa qu’una botiga a Tolosa pòt viure ! Dubèrt 7 jorns sus 7, Evelina e Danis comptèron pas lo temps ni mai las susadas. Mas la resulta es aqui : mai de 20 000 euros de montant d’operacions pel més de decembre aprèp los 10 100 de novembre. « Faguèrem en dos mesés çò que fasiam en 6 a Sant-Joan de Vedàs », çò nos dis lo Danis. Mai de 5 000 clients diferents passèron lo lindal de la pòrta.
E lo pega-solet « Romegues pas e passa davant » n’es totjorn la causa la mai demandada. « Bravament d’estrangièrs ne prenguèron un. Per elses es una mèrca apertenéncia ». Un bon milierat de camisòts li passèron tanben. »Vegèrem passar 29 nacionalitats. E aguèrem de chèques de 29 despartaments diferents. Mai que per l’Estivada! » Plan content lo Danis ! A Tolosa, Macarèl vendèt de tot. Cò qu’èra pas lo cas a Sant-Joan. « La vèsta polaria es lo sol d’aquò que vendèrem pas ! »
Macarel va tornar
Donc es solide, Macarel serà tornamai sus Tolosa en 2014. Mas benlèu pas al numerò 13…Dins una botiga anciana que se sonava « Liste Rouge ». « Pel pas de pòrta, lo proprietari nos demanda 150 000 euros. Plan al dessús del prètz del mercat. Va èsser dificil per nautres. Volriá dire trabalhar gaireben 7 ans per res. Mas volèm demorar carrièra del Taure. Es aqui que i a de passatge, e subretot los toristas. » Doncas Macarel tornarà dubrir fin de mars, debuta d’abrial. En esperant, Danis e Evelina son pas vertadièrament en vacanças. Van anar vistalhar totas las botigas de Macarel : 300 en França e 380 en tot amb Espanha e Italia. I a pas a dire : Macarel vira coma cal !
Benoît Roux
