19 Déc

Estudiants del Miralh : OSCA!

 

osca_2La facultat del Miralh aviá ja son siti bilingüe occitan/francés (de fintar lo nòstre pòst del 2 d’octobre), aqui qu’a tanben dempuèi aièr una associacion d’estudiants que se sonarà : OSCA !

Dimècres, èran un bon vintenat en licéncia de letra, master e doctorat de la facultat tolosenca a s’acampar per decidir del nom e de çò que volrián far. Ne son arribats a OSCA, una associacion d’estudiants, mas dubèrta a totes. Pas de president, ni mai de responsable designat mas l’enveja de far conéisser l’occitan a la facultat.

 

E los projèctes mancan pas.

Fa un an qu’un talhèr de danças tradicionalas vira plan coma cal. Va contunhar e far saure qu’es aqui. De d’aprèp, un acamp mesadièr va permetre de caminar. A començar al dintre de la fac que l’occitan i es pas plan visible e quitament de còps que i a tirat de las afichas o del pauc de senhalitica occitana presenta.

De d’aprèp, se parla de repais a l’Estanquet (un bar occitan) de Tolosa per partajar e escambiar. D’un festenal sus una setmana (en abrial ?) coma s’en fasiá un a Pau (« A Pau qu’ei e qu’ei a Pau »). E per de que pas un blòg de l’associacion…

Aprèp un brave moment de sòm dempuèi que lo MED’OC exista pas mai a Tolosa, veire venir una associacion estudianta numerosa e plena de vam es una plan bona causa. OSCA per eles !

osca

Benoît Roux