Fa mai de tres ans que los podèm ausir sus las ondas de CFM. Tres ans que se rison de l’occitan d’un biais seriós. Arnaud e Joan fan descobrir çò qu’es la cultura occitana, e pas solament per los que li coneisson pas res ! Lo titol « L’occitan pels nulasses » jòga sul fait que s’adreça als nuls e tanben que tot aquò es fach per de nulasses. La trufariá val tanben per se !
Cada setmana, fan de falordisas plan soscadas, en tota libertat, sens pretencion. Mai que mai en francés, mas dins un occitan plan brave tanben, son a comentar l’actualitat aquí tanben mai francesa qu’occitana. Se sentís que son al fial e que s’endevenon plan estant que se coneisson dempuèi 20 ans. Una mena de revista de prèmsa qu’es pas sens rapelar la plan famosa de Coluche sus Europe 1. S’en tiran plan tanben ambe de dessenhs. Ah los falords ! De dessenhs per la ràdio…Urosament que i a Facebook !
Fa plaser de los escotar lo dijòus sus CFM Rodés o lo dimenge a La Vila (Vilafranca de Roèrgue), mas tanben sul nèt. Son encara escampilhats sus Ràdio Occitània e Ràdio Lengadòc. Los avètz benlèu ausits e resconeguts dins lo South-Park revirat en òc. Tot aqueste monde fan ben la pròva que la tradicion plan occitana de l’umor e de la trufariá es a reviscolar ! Osca !
Dins l’emission del 17 de genièr parlèron tornamai del nòstre blòg en diguent que se voliam escriure quicòm suls elses seriá ambe plaser…
Gauthier, Aurélien, i avèm metut un pauc de temps mas en prima, sètz tanben dins lo fenestron !
Potons als Aveironeses !
Lo Benaset
