Lo grop respira la convivéncia : se vei lo plaser d’èsser amassa, de cantar, de partajar. Una jòia que dura dempuèi 10 ans. Aprèp « Cap aus sorelhs » que fasiá un pauc de plaça a la tradicion religiosa, an volgut tornar a la sorga de la canta polifonica pirenenca : lo partatge. E donc de cançons de taula de Biarn e Bigòrra. E per enregistrar, se son tanben causit una bona taula : la de l’estudiò Condorcet de Tolosa. D’artistas prestigioses i son passats mas es pas per aquò : « Avem passat 9 meses a cercar lo son que nos agrada. Voliam pas mai de glèisas mas quicòm que sone coma a l’ostal. Travalhar sus la proximitat de la votz e non pas l’escampilhar. 9 meses es una bona gestacion e avèm trobat aquest’endret plen de fustas. Un estudiò fargat coma los ingleses de las annadas 70. I a un petit resson que nos agrada, un ambient mat e calorós. » Pascal Caumont es content. Aqueste disc novèl es una escomesa : pas d’artificis, pas d’efècts, sonque las voses per enstruments.
Olivier Capmartin, Fabrice Lapeyrere, Bastien Zaoui e Régis Latapie an lo son collectiu. Pel còp tresen, son a enregistrar amb Audrey Ginestet qu’es tanben bassista d’un grop tolzan que monta : Aquaserge. Los 15 tròces son gaireben dins la taula. Dedins, 9 cançons tradicionalas entengudas de pertot dins las cantèras mas tanben 6 creacions coma « A l’entorn de la taula » qu’avem pogut filmar. O encara lo que dubrís lo disc « Adishatz camaradas » de Terèsa Pambrun que signa 3 textes. « De còps que i a, tot part d’un texte conegut e de d’aprèp Terèsa imagina la seguida e ne fa quicòm mai » nos ditz lo Pascal.
Lo disc « Ligams » sera sus la taula a la debuta d’octobre e lo grop partirà en virada dins los estanquets. Mentre que van participar a 10 videos-clips realizats per Amic Bedel per festejar los 10 ans. De filmes en plan sequéncia rodats a Tolosa, as Albi, sul Canal de Miègjorn, Tarba per far lo ligam entre tradicion orala e patrimòni de tota mena. Aquòcomença tre lo 8 de mai a Montsegur ambe de drònes! Aquò promet. A la dintrada, seran tanben dins un barri de Tolosa per far una « residéncia » de territòri amb una escòla e los estatjants. Totjorn lo ligam, totjorn l’escambi !
Lo Benaset
