Aprèp lo « Passatge Maurici Andrieu » de Senta Gabèla baptejat en octobre de 2012, aquí que lo Maurici a tanben son « vira-l’ase » pas plan luènh de la 3. Un giratòri ont es marcat : Maurici Andrieu, comedian òme de ràdio e de television, un fenestron ont demorèt de 1981 cap a 1998. Es la municipalitat anciana de Tolosa que decidiguèt d’aquest’afar.
Giratòri de La Cepièra (Tolosa) Fòto : Amic Bedel
Lo Grelh Roergàs va tanben publicar dins quauques jorns una pèça del Maurici : « L’Estar Latina ». Un sol en scèna ont conta son enfança sus las tèrras de Roèrgue, sa passion pel teatre, lo mètge per fòrça… Un libre acabat d’escriure en 2004, dins la lenga jucosa, rica e esmoventa de Maurici.
Tirat a 300 exemplaris, L’Estar latina es ara disponibla, al prètz de 8 €. Se pòt comandar al Centre Culturel Occitan du Rouergue per telefòne (05 65 68 18 75) ou per mail (contact@ccor.eu). Se pòt tanben crompar dins de librariás aveironesas e tolosencas.
Aviá ja publicat « Per teatre començar » en 1980 e « Lo covent de la Marcé d’a Malavila » (fòto), Mémoire de la Société des amis de Villefranche et du Bas-Rouergue, en 2000.
Lo Benaset
L’ ESTAR LATINA (extrait)</p#>
SCÈNA I
( Ritme de comptina )
-Ai tres ans ! Ai tres ans !… E un capèl roge !… Ai tres ans ! Ai tres ans !… E un capèl roge, tot redond… Es de feutre, es doç, es polit…
( Doás personas bèlas son censadas parlar al dessús del drollon )
-Lo paure dròlle, a perduda la seuna momà…
-A bon !… E de de qué ?…
-Ò !… la malautiá que perdona pas… La malautiá del sègle…
-E sètz vos que l’ avètz…
-Nani !… Es la seuna memin, la maire de son paire, que lo prenguèt, qu’ aviá pas que sonca sièis meses…
