La presidenta de Region critica las refòrmas dau bachelierat e dau licèu.
Dins una passa de las mai complicadas, es un sostenh que fai de ben au morau daus ensenhaires d’occitan. La presidenta de la Region Occitania-Pirenèus-Mediterranèa, Carole Delga, escriguèt una letra per dire tornamai son estacament a la transmission d’aquela lenga e ataca la refòrma dau bachelierat. « De senhaus nombroses, nacionaus o regionaus, m’alèrtan sus una degradacion de las condicions de l’ensenhament de l’occitan » explica Delga, que maneja plan l’eufemisme. La presidenta rampèla que lo 5 de març passat, l’amassada regionala votèt un « vòt » per la « valorizacion » daus corses de lenga d’òc. Un tèxt que demanda au ministèri de l’Educacion Nacionala « los reajustaments necessaris de las refòrmas dau licèu e dau bachelierat », que son acusadas d’aver redusit « l’ofèrta d’ensenhament de las lengas regionalas ». Dins lo meteis temps, Carole Delga s’adreça aus rectorats de Tolosa e Montpelhièr, en lor demandant de signar e aplicar las convencions pel desvolopament e l’estructuracion de l’occitan. Aquelas convencions existisson dins cada acadèmia concernida per una lenga minorizada, son pactadas entre lo rector e la Region e determinan los objectius de crèis pels corses d’aquela lenga. Una convencion cadra foguèt signada entre las regions Novèla Aquitània e Occitania-Pirenèus-Mediterranèa amb l’Educacion Nacionala en 2017, mas aquel cadre demanda una declinason locala. Es mes en plaça dins l’acadèmia de Bordèu, l’es pas a Montpelhièr e Tolosa.
La presidenta de Region conta tanben dins son corrièr que la senhaletica en òc se deu espandir dins los licèus de sa collectivitat, abans de clavar per « son engatjament en favor d’aquela diversitat culturala », en òc.
Vos prepausam de legir la letra de Carole Delga, siágue aicí, siágue en dejós
