Es un afar de calud : 280 km sus de chancas de Baiona cap a Marmanda. E per de que ? Pel plaser, per partajar quicòm ambe los amics, ambe lo monde en general e benlèu cambiar los punts de vistas al sens pròpri coma al figurat. Esser sus de chancas dona d’hautor e permet de far caminar la lenga e la cultura.
Chancada
L’an passat, un planponh d’amics lança la primièira chancada. Un detzenat de seradas-estancs per promòure l’occitan, 250 km a s’engolir sus un simbèu gascon : las chancas. Caro Dufau que se maina tanben del primtemps de l’Arribèra n’a l’idèia e lança l’afar. Demandèt e obtenguèt un finançament participatiu sus ulule que permetèt d’organizar seradas festivas. L’edicion de 2014 foguèt bona e encorajanta , per aquest’an, pas mai de finançament participatiu mas las collectivitats territorialas que fan pordèl, e quauques kilomètres en mai. Lo biais demòra lo meteis : es una passejada -e pas una competicion- e la Chancada s’empeuta sus de fèstas e manifestacions locals per aver mai de reclams.
Chancaires
Longtemps las chancas faguèron partida dels paisatges gascons de las Lanas. Sus de chancas leugièiras e bassas, los pastors susvelhaván los tropèls. Los factors n’avián de pus nautas per fa lo lor mestièr e anar pus viste. En 1850, lo primièr pin es plantat dins las Lanas per Napoleon e d’autres van venir. Modifica complètament lo paistage e lo pastoralisme. La fin de las chancas es anonciada. Dempuèi los grops folclorics contunhan de dansar amb elas e existís totjorn una federacion esportiva dins las Lanas. L‘associacion « Chancaires » de Sent Pèr de Lèren trabalha dessus dempuèi 1948, fa tanben de corses de tota mena e organiza lo Primtemps de l’Arribèra que fa flòri. An volgut se servir d’aqueste simbèu fòrt e simbolic de la chanca per contunhar de butar la lenga e la cultura quitament a Baiona qu’a un pauc doblidat son occitanitat. Diluns van arribar a Marmanda. Viure al País i serà per vos prepausar un reportatge a la dintrada. Los podètz seguir sus lo lor siti o los anar encoratjar sul terren !
Lo Benaset
