Quines engatjaments per l’occitan abans lo 2nd torn de las municipalas?
Prefectura del departament d’Aude, mas tanben l’un dels sitis mai coneguts de França tota, mercés a sa ciutat medievala, Carcassona es pasmens una vila que vei sa populacion estagnar (una baissa de 1000 estatjants se constata sus las 5 darnieras annadas) e qu’es uèi despassada en talha per sa jos-prefectura, Narbona. Amb doas escòlas Calandreta, una ofèrta fòrta dins lo servici public, una seccion de l’IEO qu’es tanben un editor, la cultura occitana es aicí plan representada. E cada an, per la Carcassoneta, se fai la fèsta en occitan del centre-vila fins a ciutat.
Pasmens, mantuna votzes fan ausir de criticas, coma aquela del cantaire carcassonés Mans de Breish sus facebook, que regreta l’abséncia d’artistas occitans dins la programacion dels « Rescontres Culturals d’Occitania a Carcassona », una seria de concerts que la comuna organiza per remplaçar lo festenal costumièr que lo covid enebiguèt.
3 tièras son encara en pista per ganhar o gardar la comuna. Emai la situacion s’es esclarcida dempuèi lo 1er torn au mes de març. Arribat luènh dabans, lo conse UDF Gérard Larrat – que faguèt un 1er mandat de 2005 a 2009 e que tornèt en plaça en 2014 – a vist son oposicion se recampar. Sa daufina, la socialista Tamara Rivel, s’aliguèt amb lo 4en, Xavier Bigot, que menava una lista d’esquèrra, ciutadana e amb de representents EELV e PCF (e qu’auriá poscut candidatar au 2nd torn, puèique passèt los 10% de las votzes). Lo darnier dançaire convidat au bal del 28 de junh es Edgar Montagné pel Rassemblement National, que trapèt ges de partenari.
Coma dins tota la region, emai dins tot lo país, l’abstencion foguèt fòrça fòrta au 1er torn. Gaireben 60% dels electors se desplacèron pas. Una chifra que deuriá baissar, ara que la crisi sanitària s’apasimèt un pauc.
Vaquí lo detalh de las resultas dau 1er torn lo 15 de març 2020:
- Gérard Larrat (DVD): 32,81%
- Tamara Rivel (PS): 18,25%
- Edgar MONTAGNÉ (RN): 16,52%
- Xavier Bigot (DVG): 11,95%
- Jean-Noël Crouzet (Div): 8,15%
- Marie-Hélène Régnier (LREM): 7,84%
- Christine Pujol (Div): 4,48%
Per representar la tièra de l’equipa que sortís (« Pour Carcassonne »), e son menaire Gérard Larrat, es l’actuala adjunta Magali Bardou que nos respondèt. E que volguèt contradire las criticas sus la programacions d’artistas occitans per la comuna: « Avèm agut pendent 3 ans l’espectacle son e lum [Lumina amb lo grop Òc, NDLR] sus l’empont del grand teatre de la ciutat. A la sala del capèl rotge i aguèt d’artistas occitan, e tanben dins l’encastre del festival off pendent l’estiu, sus d’emponts a gratis. Doncas i aguèt una visibilitat culturala. » L’adjunta insitís tanben sus l’ajuda per las doas Calandretas que son albergadas dins de locals de la vila e qu’aguèron accès al teatre municipal e a diferentas salas per lors eveniments: espectacles de fin d’annada o fèsta de Nadal. L’interraccion amb las escòlas es tanben mesa en abans pel desvolopament de la senhaletica bilingua, que se deu far amb l’ajuda daus escolans.
A esquèrra, trobam una figura de l’occitanisme a Carcassona, sus la tièra « Une énergie nouvelle pour Carcassonne » de Tamara Rivel. Alan Roch, en 24ena posicion, representa lo Partit Occitan sus la lista. Son ambicion, puslèu que « metre tres panels per l’eleccion e desaparéisser aprèp pichon a pichon », es de menar una politica transvesala vertadièra. Metre d’occitan « dins totes los domenis », e valorizar « l’identitat occitana » de Carcassona. « Es de planher qu’a ciutat lo mond se poguèsson passejar sens saupre tot l’enjòc cultural e civizacional que i aguèt a l’Edat Mejana ». Alan Roch se vòl pas acontentar de las tematicas costumièras: en mai d’un sostenh a l’ensenhament o de l’ajuda a l’accion culturala, vòl d’occitan per l’economia tanben o per l’accion sociala de la vila.
A l’extrèma-drecha, amb sa tièra Rassemblons Carcassonne, Edgar Montagné vòl « far la promocion » de la cultura occitana, « qu’aperten a tot lo mond ». Dins son programa es escrich que vòl una « mesa en abans de las informacions en lengas occitana e estrangièras » pels toristas. Nos explica que « lo torisme es ligat a nòstra istòria e nòstre patrimòni, podèm pas èsser mai dins la cultura », e afortís voler desvolopar aprèp la senhaletica autra que toristica. Per la question de l’ensenhament dins lo servici public, Edgar Montagné considèra que los escolans devon poder seguir de corses d’occitan, « mas sens obligacion ». Enfin es de notar que lo candidat del RN lancèt sa campanha en novembre passat amb una video que volguèt jos-titolar en occitan, emai se l’ajuda d’un professor seriá estada necessària per corregir lo tèxt.
