Dijòus 11 de gènier, la FELCO portèt sas revindicacions au ministèri de l’educacion nacionala, se parlèt en prioritat daus pòstes aus concors d’ensenhament.
Maria-Joana Verny, co-secretària de la FELCO
Dempuèi lo mès de mai, la novela còla en plaça au ministèri de l’Educacion Nacionala reçaup sos interlocutors, e las lengas minorisadas deguèron un pauc esperar. La FLAREP (Federacion per las Lengas Regionalas dins l’Ensenhament Public) aguèt un entreten en decembre, amb de representents de cada lenga dins la delegacion. Fin finala es lo 11 de gènier qu’un acamp consacrat sonque a la lenga d’òc dins lo servici public se tenguèt. Jan Lespoux lo president de la FELCO e Maria-Joana Verny, la co-secretària, anèran a Paris encontrar Matthieu Lahaye, conselhièr dau ministre Jean-Michel Blanquer. Aquèu ministre aviá declarat au mès de junh que seriá « en sosten a una vitalitat de las lengas regionalas ». Pasmens, per Maria-Joana Verny, son equipa « debarca » e sembla descobrir lo sicut. Alara que s’aprenguèt a la davalada una demesida dau nombre de pòstes au Capes e qu’un sol seriá acordat a la tota novela agregacion, lo conselhièr prometèt de faire remontar las demandas de la FELCO mas « evitèt tota prèsa de posicion clara e tota promèssa de melhoracion », segon la federacion que publiquèt un compte-rendut sus son siti internet. Ren doncas permet per ara de vèire cossí se concretisarà la promessa de campanha d’Emmanuel Macron, facha en responsa au questionari 2017oc.fr: » Les moyens de l’expression des langues régionales seront accrus. Ainsi, le candidat d’En Marche !, facilitera, dès l’école, l’apprentissage des langues et cultures régionales, dont l’intérêt éducatif, linguistique et culturel est reconnu. »
Vos prepausam una entrevista amb Maria-Joana Verny, registrada just abans lo rendètz-vos au ministèri, per explicar los enjòcs dau rescontre.
A l’escasença de l’entreten a l’Educacion Nacionala, los representents de la FELCO balhèran au conselhièr 67 dorsiers de projectes pedagogics daus professors d’occitan, realisats o en via de realisacion. Aqueles projectes vènan de tot lo territòri d’òc e de totes los nivels d’ensenhament. Son mèses a disposicion dau public sul siti de la FELCO au ligam seguent: http://www.felco-creo.org/category/pedagogia/experiencias-pedagogicas/
Marius Blénet
