Duèi de matin, lo collectiu de Catalonha Nòrd SEM teniá conferéncia de prèmsa a l’Ostal d’Occitània de Tolosa sul nom de la region Miègjorn-Pirenèus Lengadòc-Rosselhon. SEM ven de lançar una campanha per aparar lo nom « Occitania Pais-Català » dissabte a Talatüll (Tautavel), duèi a Tolosa e Narbona. Per elses, pas cap de dobte, cal una referéncia a Catolonha dins lo nom novèl. Una pausicion fèrma que Jaume Roure e Pere Manzanares an volgut justificar.
Catalonha mai que d’autres
Fa dos ans que lo collectiu se montèt, en reaccion a la lei NOTRE e donc a le reforma territoriala. Aquò per aparar una identitat catalana que seriá menaçada ambe la region novèla. Pere Manzanares manca pas d’arguments per convéncer los Occitans e los autres d’oblidar pas los Catalans. « Lo catalan es una lenga e mai de 1200 ans d’istòria. Una identitat reconeguda, dubèrta e partajada. » Aquò per respondre a los que dison que se començam d’ajustar « Pais Català », per de que pas Roergue, Gasconha, e patin e cofin. « Sem aqui per nos justificar e non pas per far los rondinaires », çò dís lo Pere.
Avem comprés, Catalonha es plan mai qu’un autre territòri. « Deja, dins lo nom ancian, Rosselhon èra acceptable mas mancava Conflent, Capcir, Cerdanha, Vallespir… ». « Cha nautres, i a una marca prigonda, un estacament a una lenga e una cultura qu’òm tròba pas endacòm mai! » L’ancian elegit de Perpinhan e membre d’Unitat Catalana confirma. Les « Monsieurs plus » vos disi. Catalonha e los Catalans, an quicòm en mai dels autres. Pas complètament false, mas un pauc orgulhós ! E de contunhar : « Occitània e Lengadòc, encara aquò passa. Mas pas Pirenèus-Mediterranea ! » Lo collectiu es vengut per trabalhar ambe los Occitans e sustot los convéncer. Coma per exemple ambe l’estatut particular de la Vath d’Aran donat per Catalonha e que reconeis l’occitan coma lenga oficiala. Cò que demanda un pauc de retorn ara en Occitània.
« Occitània-Pais Català » en campanha
Aprèp de debuts un pauc malaisits ambe lo Comitat del Nom ont i aviá ben un representant del collectiu SEM, mas non pas un membre… Resulta : pas de nom prepausat ambe « Catalonha » mas sonque « Occitanie-Roussillon » sauvat al darrèr moment qu’es vengut ara « Occitanie-pays-Catalan »… Aprèp de comunicats un pauc desplaçats coma que Catalonha Sud s’anava mobilizar per votar, çò qu’es tecnicament pas possible… Aprèp tot aquò la campanha pel nom « Occitania Pais-Català » comencèt dissabte passat aTalatüll (Tautavel). 10 000 pegasolets ambe lo nom causit en francés e catalan seran pegats, de resconstres ambe lo monde se faràn un pauc de pertot coma aqueste vèspre ambe « Païs Nòstre » a Narbona. Pas d’accions particularas, pas de causas violentas tanpauc pel moment nos dís Pere Manzanares… Mas mèfi : « quand los Catalans venon del Sud e qu’arriban al Nòrd, es marcat : « Bienvenue en Languedoc-Roussillon ». S’es marcat « Bienvenue en Occitanie », va caler remplaçar lo panèu cada setmana! » çò dís Jaume Roure. E Pere Manzanares de contunhar :
Nos acontentarem pas d’Occitània !
Cadun se soven evidentament de l’episòdi del nom de « Septimanie » volgut per Frêche que metèt tot un pòble per carrièra. Fa 10 ans e segur que los Catalans son prèstes per se tornar mobilizar. Encara un autre « mai que los autres » per Catalonha. Mas de còps que i a, a volgure tròp…
Vòli plan èsser clarvesent sus Occitània e per de que pas ajudar los Catalans. Mas francament : es qu e lo nom d’Occitània es definitivament pas acceptable per un Catalan al punt de n’arrancar los panèus ?
Lo Benaset
