Aquesta setmana, avèta benlèu ausit aquel mescladís de musicas tradicionalas de China e d’Occitània ambe de salsa jazz. Se sona « Entre Cèl e Tèrras », un projèct palancas menat per un crane compausitor de jazz presentat diluns a Tolosa e en concèrt a Pavia dins Gèrs pel festenal Tard’Envie. Aquí lo reportatge que lor avèm consacrat pel jornalet de la 3. Podètz tanben legir la presentacion de la creacion sul blòg.
Jean-Christophe Cholet es sortit de Cantal mas demòra a Montargis, una vila qu’a fòrça ligams ambe lo provincia del Hunan que se tròba al centre de China. Cal dire que Deng Xiaoping i demorèt quauques temps. A donc imaginat « Entre Cèl e Tèrra » per far lo reclam de las musicas tradicionalas de las minoritats Tujia e Miao ambe de borrèias d’Auvèrnha e tanben las compausicions de Guilhèm Lopez. Tot aquò amb una seccion ritmica jazz : Gildas Boclé a la contrabassa, son filh a la batariá e el al piano.
Un pauc de timidat a la debuta, lo temps de se conéisser, de s’escotar, entre monde pas acostumat d’improvisar tals coma los de China e una musica jazz que vira a l’entorn d’aquò. Aprèp un viatge en China e la venguda dels Chineses en Occitània, los artistas s’endevenon plan.
En vistalha a Tolosa, lo parat d’ausir d’enstruments tradicionals, classics o naturals…
Lo Ehru, una mena de violon ambe sonque doas còrdas, jogat per Xia Xunmin un musicaire classic
Lo cant de las montanhas de Dòna Wu Labao acompanhat per Zhang Kaisheng, dit « A-jun » que jòga de la fuèlha. Per la pichòta istòria, aquesta fuèlha ven del ficus de l’òrt de Guilhèm !
Zhang Kaisheng que jòga tanben de l’òrgue a boca, un pauc l’aujòl de l’acordeon en China sul plan de la sonoritat…
Per ara, los artistas chineses s’en van deman. En setembre, Jean-Christophe Cholet e Guilhèm Lopez anaràn un còp de mai en China per d’autres rescontres e maites concèrts Entre Cèl e Tèrras.
Lo Benaset
