23 Avr

La Granja engranja

Pendent 3 jorns, la Prima Occitana dels Causses de Carcin a encornat e estuflat lo Pargue Regional. 3 jorns d’animacions bartassièiras organizadas amassa entre l’associacion la Granja e lo Pargue per festejar las musicas verdas. La Prima s’acava aqueste ser e la Granja va estrenar sonses 10 ans tota l’annada. Los sèm anats estuflar.

Estufles, còrnas e autres enstruments bricolejats en plena natura

Dijòus de matin, la gara anciana de Cajarc aviá maites estufles que lo d’un cap de gara. A l’entorn d’Arlette Bonnefous dels « camins bartassièrs » e Michel Cros, de dròlles e ainats venguts per ensajar de se fabricar de siulets ambe la rusca de castanhèr e de fraisse. Guilhem Boucher e Zavièr Vidal son aquí tanben per far pordèl. A los veire e sustot los ausir, solide que li prenián un brave plaser. Sul còp de 11 oras, aquí que lo Dominique Boucher estufla a son torn…

Mena la draisine de l’associacion Quercyrail que damandava pas mai que de caminar….e de cornar ! E aquí que totes los estagiaris montan per anar quèrre una bròca pas tròp enfulhada de fraisse o castanhèr, a la broa del camin de fèrre. Aquò se sona las musicas verdas! Mèma causa l’aprèp miègjorn ambe las canavèras de Jean-Pierre Lafitte, lo divendres ambe Alain Cadeillan que faguèt un « Kachtoun » ambe un fum de causas e d’inventivitat ! 3 jorns donc de talhièrs ambe d’especialistas d’Occitània mas tanben de Bretanha, una taula redonda aquest’ aprèp-miègjorn e per clavar, un concèrt bal aqueste ser. Al menut : Zavièr Vidal, Daniel Loddo, Erwan Lhermanier, Jean-Yves Bardoul, Jean-Pierre Lafitte, Daniel Frouvelle, Henri Maquet, Coco Le Meur, Alain « Kachtoun », Guillaume Roussilhe… La Granja festeja donc coma cal los 10 ans amb un ramelet d’artistas e quòi pas acavat !

Reportatge : B. Roux J. Levé M. Blasco K. Glöck J. Eon


Prima occitana par france3midipyrenees

La Granja fa los 10 ans

L’idèia ven de Zavièr Vidal : trobar un luòc dins Òlt que serviguèsse a l’encòp de luòc per recampar la memòria de las tradicions e de las praticas (mai que mai oralas), quicòm tanben de plan viu per las escampilhar. La Granja s’es donc requilhada dins una granja anciana a Solòme (Soulomès-Lot), en plen Pargue Natural dels Causses de Carcin que n’es lo partenari. Pauc a pauc, los capiòls se montèron e las parets s’emplenèron… Al dintre : centre de ressorgas, programacion d’artistas, formacions…

E dempuèi 2 ans, una « botica » dins un granjon qu’es pas facha per crompar mas si ben tant per se fabricar los enstruments. Cada divendres e dimenges aprèp-miègjorn, Michel « Coco » le Meur es aquí per adujar los que vòlon petassar o fargar un enstrument tradicional, mai que mai los que son ambe de còrdas.

image

Lo mèstre de musica de la Granja se sona Guilhem Boucher, emplegat dempuèi 2008 e qu’es tanben vici-president del Pargue. Puslèu que de far un sol crane eveniment, la Granja a decidat que ne far autant que sas annadas. Tre la setmana que ven, lo parelh Abela-Vidal serà aquí per presentar son primièr disc a Solòme. En setembre, la darrèida dimenjada serà dedicada a la viòla, en octobre seran las « Violonadas », en decembre un « Cafè cantaire », totjorn a Solòme. La Granja fa de bravas missons en totas sasons.

Lo Benaset