Fa 15 ans, Florent Salinié vistalhèt l’ostal d’Occitània de Tolosa ambe d’amics e se diguèt : « Tè seriá plan per far un restaurant ». Lo 15 d’abrial serà fach. Un canton de convivéncia per copar la crosta, charrar, escotar de musica, descobrir de causas. L’Agenés a mai d’un torn dins sa topina. Lo topin es ja sul fuòc mas a besonh de la vòstra flama per s’alucar complètament.
Lo projèct : un luòc de vida
Far un luòc de convivéncia per completar çò que i a ja a l’Ostal d’Occitània e animar l’endrech. 30-35 mètres carrats, 3 o 4 taulas dedins, encara mai defòras, de que assadolar un cinquantenat de personas. Un luòc de vida bilingüe dubèrt del dimècres al dissabte de 10 oras del matin cap a 10 oras del ser. Valent a dire que serà complementari e que farà pas la contra a l’Estancabra, ancian Estanquet. Li se farà d’animacions, en ligason ambe l’Ostal e la Tuta d’òc. Lo comptador va èsser realizat per una ferronièra d’Òlt e Garona e lo decòr per de Tecnicians dels Mestièrs de l’Espectacle diplomats. Original. L’idèia es tanben de retransmetre de partidas de foot e de rugbí.Un afar de benevòl al debut, amai se l’idèia es d’arribar lèu a se pagar un(a) servicial(a) e de que se ganhar la sopa pel Florent.
Lo tipe es tombat dins la topina
Florent a deja tengut aquesta mena d’afar en Catalonha. En 2008 dins un ateneu (centre cultural associatiu) a Barcelona, puèi un segond còp per un bar del pòble. Aima fòrça topinejar. En mai de la coeta de la padena, tenguèt tanben lo micrò a Ràdio Occitània e fòra de gratar las caçairòlas sap tanben fretar la guitarra ambe Tira-Taps o se cargar l’acordeon diatonic. Es membre tanben de l’associacion « Fasèm de Bruch » ambe los Gats de Ràdio Occitània : Guilhèm Gratiolet (Topinaire president) e Alex Chiavasse (Coberton e clavaire de la Topina). Sortit d’Agen, a popada la lenga a l’Estanquet e la buta encara ambe lo CFPO. Sap virar la lenga nòstra, lo catalan e lo castilhan.
De que i a dins la Topina ?
Vist lo canton per salsinejar, la cosina serà simpla : tartinas, ensaladas, afogassets, bocadas… Tè : cossí diriatz « tapas » en occitan ? Lo jòc en lançat. Totes los productes seràn del canton, vin de galhac, cervesa de Carcin, carsalada del mercat Victor Hugo de Tolosa, fetge gras de son país, formatges del coet, tapenada… De causas de partajar, qualitadosas e mai que mai certificadas « Òc per l’occitan ». Un dimenge cada mes, se poiriá far una cantèra. Voldriá tanben far de talhièrs de cosina ambe los mainatges. La topina se va emplenar pauc a pauc, la cosina serà pus trabalhada se las parets se butan.
Cal ara metre de grais dins la topina
Lo projèct es portat per l’associacion « Fasèm de Bruch » e de benevòls. Serà un luòc associatiu. La comuna de Tolosa paga las òbras per petassar l’endrech mas i a besonh d’utisses per topinejar, lo cobèrt, las taulas, crompar çò que cal coma productes e lançar l’afar. Es per aquò que venan de lançar un finançament participatiu sus Ulule, istòria que la convivéncia foguesse aquí tre la debuta. La Topina levarà lo coberton lo 15 d’abrial, carrièra Malcosinat…çò que serà pas lo cas !
Per Sant Martin, l’auca al topin, per carnaval, la man al pòrtamoneda te cal !
Lo Benaset
