Quand arribèrem a Someire dins Gard, lo Denis Galvier èra amb una tronçonadoira dins las mans. A 2 jorns del batejal de son festenal, caliá encara netejar lo terren, installar de causas, quilhar lo tibanèl…Cal dire qu’aquest’an, l’associacion a degut se mudar en causa de las òbras. Pas aisit. An donc trapat un luòc supèrbe « Le quai des arts », totjorn a Someire. La mudason es pas la sola novèltat de la 17ena edicion.
Denis e sa còla al trabalh. Fòto : Lo benaset
Trapar un luòc : « Quai des arts » « Kedez »
Pas far claure mai de 600 dansaires cada jorn, cal un pauc d’imaginacion. Las Trad’ivernalas son reputadas per lor programacion e l’esperit de convivéncia que bufa de pertot. Alèra trapar un endrech ont tot aquò seriá de la partida dins una vilòta coma Someire que compta pas 5000 estatjants. Pr’aquò, an capitat. Pas plan luènh de la gara anciana, dins una mena d’entrepaus, i a duèi lo « Quai des arts ». Un luòc força bel, plan artistic, ont s’es niusada la companhiá Malabar que far d’espectacles per carrièra e de cirque. Aval, s’i tròba doas salas per far lo balèti (lo Kedez), un bar, una cosina e pron plaça per quilhar lo tibanèl defòra. Un luòc que coneis Coriandre estant que li fan lo balèti de la davalada.
Trapar de moneda
Autra dificultat, de subvencions demesidas de 4000 € sus un budgèt de 50 000… Alèra que i a 2000 € de fraisses en mai ! Alèra l’associacion faguèt una crida als benevòls e al amics musicaires e dansaires. La divendres ont se manjava de costuma la sopa abans de dançar es ara devengut pagant. A calgut prene un tibanèl pus gròs per claure mai de monde. Ajustar lo dimenge amb un repais partajat e de balètis per degelir.
Julien Régi lo programator
Ara tot es prèste
Lo Denis a daissat sa combinason de boscatièr debartassaire per la d’organisator dansaire. Aqueste ser, HUM, un dels rares grops qu’es pas aquí sonque per far dançar mas tanben per escotar. De world d’aquí ambe l’Aimat Brees. Juste de d’aprèp, los auvernhats de QUAUS DE LANLA reperats a l’Estivada de Rodés. Un bal a la votz, sens artifi, ambe 3 òmes. Del mème temps, jos la tèla e benlèu las estèlas los joves de BALLSY SWING e lo bolegant ZEPHIR COMBO. Los programators an l’aurelha fina e dubèrta. De grops de pertot : Occitània, Bretanha, Itàlia, Soïssa. Deman dimenge, la fèsta contunha. Ambe lo repais ont cadun se pòrta lo manjar dins la saqueta e JUKE BAL e FAI DELI se los pès vos prusan ! Per ne saber mai, las Trad’Ivernalas an ara una aplicacion sus portables e smartphones. E Bolèga !
Lo Benaset
