« Visca Catalunya lliure ! », aquí los primièrs mots de Carles Puigdemont alèra que ven d’èsser lo 130en cap de la Generalitat de Catalonha. De la meteissa tendéncia que son davancièr Artur Mas, fa plan mai de temps que buta per l’independéncia. Mai que jamai, l’independéncia es en camin. Mas lo camin serà torsut.
Carles Puigdemont prend les commandes de la Catalogne pour l’amener vers la sécession
papier de Aude Chéron France 3 Pays Catalan
Un independentista convençut
A 53 ans, la carrièra politica de Carles Puigdemont ven de s’envolar. Fins a ara, son nom èra desconegut a l’internacional ; mas pas en Catalonha. A crescut a Amer, pas plan luènh de Girona ont lo catalan es present de pertot. Rejonh l’organisaciopn culturala « Solidaritat en Defensa de la Llengua », puèi las Joinessas nacionalistas de Catalonha. Aquel enfans de pastissièr ven diplomat de literatura e filològ. Aquò lo mena al jornalisme, dirijarà lo jornal El Punt. Parla catalan evidentament, castilhan, roaman, inglés e francés. En 2011, ven cònse de Girona, un pauc coma ara dins una cèrta suspresa. Cal dire que la vila èra dins las mans del PSOE (PS) dempuèi de decenias. Fa metre la bandièra catalana al fronton de la comuna. Aprèp las darrèiras eleccions de setembre, declara tre lo mes de novembre que se cal desseparar d’Espanha.
Tenim un projecte engegat, ben orientat i sòlid. Tots hi som cridats, tots ens fem falta. Gràcies, president, per liderar i per perseverar.
— Carles Puigdemont (@KRLS) enero 9, 2016
Dimenge, declarèt : « Ma tòca es de negociar una rompadura civilisada amb Espanha, en ligason ambe l’Union Europenca. Soi lo president de l’aprèp autonomia e de l’abans independéncia. Serà pas aisit mas es pas una epòca pels paurucs. » Se dona un ana per menar Catalonha cap a l’independéncia amb una constitucion nòva d’aicí 2017. Tre lo mes que ven, vòl far una lèi per modificar l’estatut de la securitat sociala, per que siá pas mai jos l’autoritat d’Espanha mas de Catalonha.
Una Occitana de la Vath d’Aran elegida.
Aqueste periòd de cambiaments e de reviraments fa tanben lo bon astre dels Occitans. Aital, ambe la demission d’un deputat dels anti-capitalistas (CUP), Mireia Boya Busquet fa sa dintrada al parlament de Catalonha estant qu’èra en segonda plaça sus la lista dels independentistas a Lhèida. Doctora en Gestion e Amenajament del Territòri per l’Universitat de Mont-real, ven de fondar l’an passat la formació Corròp, un partit que recampa d’Occitans que vòl trencar ambe lo bipartisme de Convergència Democràtica Aranesa e Unitat d’Aran.
A per totes, qu’auem vengut a jogar eth partit. Damb veu tà Aran, Occitània, Pirèneu e Ponent. Pera Republica, entara gent
— Mireia Boya Busquet (@yeyaboya) 10 Janvier 2016
Mireia escriu tanben dins lo Jornalet e parla perfièchament l’occitan. Occitania serà donc representada ambe la deputada aranesa, coma ambe Francés Boya (PSC) en 1999 o Alex Moga (CDC) en 2012.
Lo Benaset
