Aquesta dimenjada, lo Partit Occitan organiza la primièra « Universitat de Dintrada de l’occitanisme » Se debanarà dissabte 5 e dimenge 6 a Pòrt-Leucata, dins Aude. Avèm rescontrat Patric Roux, secretari federal adjunt a la creacion occitana al Pòc, per parlar d’aquesta primièra.
Nos podètz presentar aquesta dintrada de l’occitanisme ?
La Dintrada per nosautres, al Partit Occitan, es un biais de soscar a l’actualitat de l’occitanisme, de la pensada nòstra. Vesèm plan que la societat se bolega. Sèm fàcia a una crisi ecologica, democratica, politica e benlèu que las nòstras idèas, bastidas sus la pensada de Robèrt Lafont per exemple, son pas pus d’actualitat, la societat a cambiat. Avèm a actualizar nòstra tòca, nòstre vejaire per èstre mai eficaç, mai investit dins l’accion politica.
Cossí se va debanar aquesta Dintrada ?
Es una mena d’universitat politica que se debanarà sus dos jorns : lo primièr, lo dissabte 5 de setembre, d’intervenents multiples seràn convidats amb d’apòrts teorics coma Jordi Solé, deputat de Catalonha, Gérard Onesta, ancian vice-president del Parlament Europenc o encara Nil Caouissin de l’Union Democratica Bretona. Lo dimenge, serem mai dins de perspectivas d’accions : pensi per exemple a un talhièr, en seguida de la cauma de la fam de David Grosclaude per l’Ofici Public de la Lenga Occitana, sus la question màger de l’utilizacion dels malhums socials, per aprene collectivament a trabalhar amb aqueste esplech.
Aquesta Dintrada marca un cambiament dins lo biais de far d’occitanisme politic ?
Espèri. Caliá de tot biais pausar lo fach que l’occitanisme a un besonh prigond de se renovelar. Veirem a la fin de la Dintrada ont ne serem d’aquel objectiu.
Que cal esperar concretament d’aquestes dos jorns de soscadissa ?
Çò qu’espèri es la mesa en movement dels militants. Avèm de batèstas davant nosautres : la ratificacion de la Carta europenca de las lengas regionalas, la manifestacion de Montpelhièr e las eleccions regionalas : 3 accions mai que mai importantas. S’agís de se retrobar tanben : fa un moment que los occitanistas an pas capitat a parlar totes amassa. Pensi que caliá aqueste eveniment per lo poder far.
Una entrevista difusada dins lo Jornalet del 5 de setembre sus França 3.
