DAVID GROSCLAUDE
Foto : siti internet Dàvid Grosclaude
Nascut a Chinon en 1958, David Grosclaude es un jornalista, e elegit del Partit Occitan en Aquitània.
Conegut per son militantisme e son implicacion per l’aparament de la lenga occitana, foguèt un dels paires de Ràdio País en 1983. Puèi creèt la SCOP de premsa e d’edicion Vistedit en 1994 que compta ara un setmanièr d’informacion ( La Setmana ) e dos magazines pels mainatges ( Plumalhon e Papagai ) en mai de publicar d’albums pels enfants.
Dempuèi 2010 es conselhièr regional d’Aquitània, delegat a la politica lingüistica en favor de las lengas occitana e basca. Dimècres passat, començèt una cauma de la talent amb l’eslogan « Pro d’estar mespresats » dins lo Conselh General d’Aquitanha a Bordèu, e contunharà dinc a l’oficializacion ministeriala de la creacion de l’Ofici Public per la Lenga Occitana.
L’OPLO QU’ES AQUÒ ?
En fait, d’oficis publics per las lengas regionalas e minoritàrias existisson en Alsàcia ( amb l’OLCA creat en 1994 ), en Bretanha ( amb l’OPLB un Establiment Public de Cooperacion Culturala creat en 2010 ) e Bascoat ( amb l’OPLB creat l’an 2004).
An per tòca de transmetre la lenga als adultes e mainatges, desvolopar sa socializacion e èsser un suppòrt a las politicas lingüisticas.
En junh de 2014, las doas assembladas regionalas d’Aquitània e Miègjorn-Pirenèus votèron favorablament e a l’unanimitat la creacion d’un equivalent per l’occitan : l’OPLO.
Ara, al cap d’un an d’esperar la publicacion del decret ministerial al jornal oficial que ratificarià la creacion de l’OPLO, las causas son a trastejar. De telefonadas de contunh al Ministèri de la Cultura regularament per ausir a cada còp que lo dossièr « avança » e pas res en seguida. Dàvid Grosclaude decidiguèt que aquò passava l’òsca e que caliá cambiar de musica en fasent una accion concrèta per èsser enfin escotat.
LAS ACCIONS DE SOSTIEN
Dempuèi lo prumièr jorn de sa cauma de la talent, Dàvid Grosclaude reculhiguèt lo sostien del President del Conselh Regionau, Alain Rousset, de nombroses elegits ( Guilhèm Latrubesse, Colette Capdevielle, François Alfonsi, Paul Molac, José Bové, Gérard Onesta, Jean-Michel Lattes; Martine Faure, Martine Lignières-Cassou, Dominique Reynié, Jean Lassalle, de colègas del Conselh Regional…) e d’actors associatius implicats dins l’aparament de la lenga e la cultura occitanas. Sens oblidar lo grop emblematic Nadau.
A mai una peticion en linha circula sus internet.
Lo Divèndres 29 de mai, un bèl cinquantenat de personnas s’amassèron davant la prefectura d’Aude a Carcassona e una delegacion foguèt recebuda pel Secretari General. Lo meteis jorn, l’assemblada generala de la region PACA debatèt sus la presa en compte de l’occitan dins los contractes de plan Estat-Region. Puèi, una mocion foguèt presentada als elegits de Corsega per sosténer la demanda de la creacion rapida de l’OPLO. Foguèt votada a l’unanimitat. Dissabte passat de manifestacions a Bordèus e a Narbonna… Coma Dàvid Grosclaude zo no diguèt, tre duèi, se va passar a l’etapa seguenta.
Dimècres, d’elegits regionals seran en cauma de la talent sus la jornada en solidaritat. De recampament se faràn davant los Conselhs Regionals dimècres a miègjorn.
Carolina Gayet e lo Benaset
