Dins d’eleccions despartamentalas ont l’occitan èra mai que discrèt, País Nòstre compta duèi 4 elegits sus lo despartament d’Aude. D’elegits d’esquèrra coma de drecha dins un despartament que fa pas grand causa per la lenga. Joan-Pèire Laval a plan volgut reagir e nos donar son punt de vista sus la situacion.
Pais Nòstre en campanha ambe Joan-Pèire Laval (al centre) Fòto : La Dépêche
B.R. : Avètz donc 4 elegits sul despartament d’Aude : un parelh de drecha sus Sijan, un conselhèr PS sus Carcassona 1 e un autre sus Rius de Menerbés. La vòstra causida èra la bona ?
Joan-Pèire Laval : Aviam 15 candidats (2 binòmes). A la debuta, voliam partir ambe lo moviment Bastir. Jacky Grau aviá fat campanha per las comunalas. Aviam prepausat 2 o 3 noms sus Narbona. Mas lo comitat de pilotatge de Bastir èra pas d’acòrdi suls candidats.
Quin èra lo problèma ?
Bastir trobava que lo lor engajament èra pas « vertadièr »… Coma sèm pas aquí per criticar mas per avançar, avèm decidit de far nòstre camin. Ambe Jacky Grau avèm pres lo telefòn e apelat de monde.
Cossí se faguèt la causida ?
Sèm anats veire los que coneissiam. De monde que pensam « estrategics », que son a de pòstes de responsabilitat. I a bravament de cònses. Mas a calgut far viste. N’i a que son venguts me veire aprèp en me diguent qu’aurián plan volgut signar mas èra tròp tard. Donc avèm un binòme qu’a signat a Sijan e un sol dels candidats pels autres parelhs.
A de que se son engajats los candidats ?
De primièr sus la linha budgetaria. Volèm anar cap a 2 euròs per an e per estatjant per l’occitan. Aquò nos menariá a 720 000 euròs… Sèm pas pressats ! Volèm tanben un elegit referent per l’occitan, un encargat de mission. Cal tanben sosténer las calandretas e las convencions ambe lo rectorat per l’ensenhament public. Enfin volèm tanben un eveniment cada an per l’occitan en país d’Aude. An signat e los engajaments son publics. Los avèm publicat dins la prèmsa.
Cossí se farà lo seguit ?
Es pas per ço que i a engajament qu’es ganhat. Lo pus malaisit es pas de far una causa un còp mas de tene lo maraton. L’idèia es d’anar pus luènh. Duèi de matin avèm dit que cal començar per una reunion de trabalh ambe los 4 elegits. Puèi, demandam un acamp ambe lo futur president que serà segurament lo meteis : André Viola. Alan Geniès qu’es elegit sus Rius de Menerbés vendrà segurament un dels vici-presidents. La tòca es d’arribar a fargar una commission especiala per l’occitan…
Qu’una es l’estrategia : i a de monde de totas colors politicas, es una mena de pragmatisme, d’oportunisme occitan ? Qu’unas son las garantidas ?
Cò qu’avèm fat sus Narbona per las comunalas nos encoratja. Cò qu’an signat es estat fat. Me soveni d’eleccions a trimar per pas res, d’aquelas regionalas en 2004, una aligança ambe lo PÒC, lo PNO, ERC (Esquèrra Republicana Catalan) per la lista de Christian Lacour. A costat fòrça moneda e fòrça temps per 13 500 vòtes (la mitat en Catalonha Nòrd)… Avèm ara un autre biais de prene las causas. Es un pauc de lobbying. Sèm un 100 at de sòcis a País Nòstre : de politics, de sendicalistas, d’economistas… Es un recampament sus una basa : Viure, trabalhar e decidir al País. Ambe la volontat d’un poder regional autonòm, dins un encastre federal francés. Avèm fargat un partenariat amb una cooperativa que fa de blat e de farina a Salèlas d’Aude, avèm adujat los obrièrs licenciats de Pilpa (Carcassona) per montar la lor cooperativa. Volèm ara far la meteissa causa e montar un grop País Nòstre a Tolosa per far ligam ambe lo sector economic e aver d’elegits.
Pais Nòstre es tanben a l’origina del collòqui sus la fusion regionala que se debanarà dissabte 4 d’abril a Tolosa, sala Osète, 6 carrièra del Lieutenant-Colonel Pélissier.
Lo Benaset
