A la debuta de las annadas 70, França se lança dins un programa ambiciós de construccions de barratges.
Lac de Naussac Fòto : Gérard André
Aprèp Tignes en Savòia e Serre-Ponçon en Dalfinat, vèn lo torn de Naussac, en Losèra. L’objectiu del barratge de Naussac èra a l’encòp d’assegurar l’asagatge de la plana agricòla de Limanha, en Auvèrnha e tanben de regular lo cors de Loire per l’alimentacion en aiga de las centralas nuclearas.
Se pot pas dire qu’aquel projècte foguèt plan acculhit per la populacion del canton. Al moment de las primièras despropriacions, un gèst de colèra explòsa en Margerida e lo monde del país es fòrça lèu sostengut per lo movement hippie. Cal pas desoblidar que sèm a l’epòca del Larzac !
Pasmens aquesta protèsta durèt pas longtemps e s’aflaquiguèt lèu quand las primièras compensacions arribèron. En 1981, l’enquèsta publica es boclada e la tension es calmada. La val es negada tant coma lo vilatge de Naussac. Un vilatge novèl foguèt bastit, mai pròche de la petita vila de Langonha. Pr’aquò mantuns estajants partisson del país per s’installar dins lo despartament d’ Allier.
A Naussac coma endacòm mai, la creacion d’un barratge modifica prigondament l’ecò-sistèma. La val èra autrescòps un endreit presat per la caça a la lèbre. Aquesta epòca es plan solid acabada. Los estatjants an vist arribar de novèlas menas de bèstias qu’èran fins ara desconegudas dins la region: lo gabian, lo còrbmarin, lo cabusset, la folca…Per los peisses, lo bechet e la pèrca fan la lor aparicion. Al contrari, la trocha autoctctòna desapareis.
Ambe lo barratge, una forma novèla de torisme se fa veire en Margerida : la planca de vela anima lo lac e los VTT, coma los passejaires envasisson pacificament las ribas. Los elegits locals pensan a la creacion d’un torn del lac mas d’unes agricultors an lors tèrras que tòcan lo lac e pel moment, aqueste projècte es totjorn pas realisat. De mai, en estiu, lo lac es a son estiatge per l’asagatge dels camps de mil de Limanha, ço qu’arrenga pas la practica dels espòrts nautics !
Aprèp 34 ans d’existéncia, la majoritat dels estatjants del canton a integrat lo lac dins son univèrs. Al delà de son interès per la pesca e lo torisma nautic, lo lac servís de bacin per los canadairs e las analisas de la DDASS an mostrat una bona qualitat de l’aiga. Pasmens, lo problèma del fonsièr -e per consequent l’accès a l’aiga- demòra. La contrada dispausa de qualques lòtjaments rurals mai l’agrò-torisme a totjorn de mal de se desvelopar. La realisacion de 37 kilomètres de camin de passejada a l’entorn del lac sembla una etapa importanta per la mesa en plaça d’un torisme de qualitat dins una region que dispausa de mai d’un atot.
Fòto : Gérard André
Dins lo Viure al país del 29 de març, aurètz l’escasença d’ausir los testimoniatges dels estatjants de Ròclas qu’an viscut, tre la debuta, las etapas de la creacion del barratge e consí aquel lac novèl fa ara partida de la lor vida.
Aymeric Jonard
