20 Jan

Los Occitans de sa majestat

Dimenge 25 de genièr, Viure al País serà una emission de tria dedicada als ligams entre Occitans e monde del Reiaume Unit. Per vos far despacientar, publicarem 2 retraches de dos ciutadans de sa gloriosa majestat que son tombats dins l’ola d’òc. Aquí lo primièr : l’Escossés Patrick Huthinson.

Patrick Hutchinson Fòto : Amic Bedel

Patrick Hutchinson
Fòto : Amic Bedel

Se picatz Patrick Hutchinson sul vòstre motor de cèraca seretz pas sens res : un tuaire en seria, spiritual medium, jogaire de boha, e tanben… l’esenhaire-cercaire-poèta-especialista de la literatura occitana de l’Edat Mejana : lo nòstre Patrick Hutchinson.
El que ven d’escriure Crozada d’Uèi 1209-2009, un espectacle en 3 partidas jogat un pauc de pertot.

Lo gentry man amorós d’Occitània
Menèt d’estudis literaris en Anglatèrra, de cèrcas sus lo poesia que lo menèron tot dret als trobadors, un enfachinament tre la debuta. Crompèt una antologia dels trobadors ja un boquinista de Cambridge. Aprenguèt lo francés, legiguèt Rimbaud e encontrèt tanben una Francesa a Cambridge. Decidiguèt de venir en Provença ont son paire anava quauques còps. « Soi arribat dins las annadas 60 dins Gard (Pont Sant-Esperit) ambe l’enveja de fugir ma societat subre-industrializada…Nautres avèm pas mai de paisans dempuèi lo sègle 18. Aiçí en França es diferent, ai trabalhat dins las bòrias a la debuta. Era coma una respelida per ieu que veniái de la « gentry » anglesa. »
Butèt d’estudis a Montpelhièr ambe coma professors Charles Camproux e Robert Lafont que vendrà son director de tèsi. Un trabalh sus « La literatura d’òc de l’edat mejana, poetica dels trobadors » menat a Ais de Provença en 1996. Era deja aquí quand Robert Lafont e Pierre Bec montèron l’Associacion Internacionala d’Estudis Occitans.

 

Rescontre cultural e respelida identitària
Nòstre òme que marcha sus doas cambas (carnala e emocionala) va viure mai qu’un rescontre. « Es coma una segonda naissença, un rescontre total, una cèrca espirituala. Me soi interessat al sofisme de l’edat mejana ambe Omar Khayyam…Aquí ambe los trobadors, es una cultura complèta, prigonda, enigmatica…Mancam de referencials estant que la Crosada a tot avalit. Soi d’acòrdi ambe Pasolini sul concèpte de « genocidi cultural ». La literatura dels trobadors es una literatura de diaspòra, colectada pels comanditaris, reconstituida. Es un trabalh de detectiu ! ». Pas estonant que lo Patric foguèsse un acarnassit de « Game of Thrones » !
« Om pòt parlar de sciéncia en çò dels trobadors. E la poesia èra quicòm de central dins aquesta societat de l’edat mejana, quicòm qu’aparten pas sonque als Occitans mas a totes. Dins l’espectacle Crozada duèi ai escrich aquò : cette mémoire que n’est pas à moi mais qui est pourtant mienne.»

Patrick Hutchinson par france3midipyrenees
Crozada d’uèi
L’espectacle es ben sus l’actualitat d’aquesta crozada, es pas una repapiada. Es una vision personala del Patrick qu’a legit e revirat la Cansó celèbra pendent 10 ans. Sus l’empont, l’ENTREBESCAR (un mot que agrada bravament al Patrick) un ensemble mirgalhat de comedians, eslamaires, poètas…ambe una vertadièra emission de television presentada pel Pixelman e qu’enquista sus l’afar. Las referencias son nombrosas e lo trabalh menimós. « Es un pauc l’Atlantide e vòli tirar aquel episòdi maluros de l’amnesia. N’i a que renègan e que vòlon pas veire, quitament ja los Occitans ! »
Mai occitan que los Occitans, Patrick Hutchinson trabalha duèi a far una sintèsi d’aquestas 3 partidas d’espectacles. Dimenge vòs en dirà mai dins Viure al País.

Lo Benaset

Patrick Hutchinson en enregistrament de la TEMA VAP fòto Amic Bedel

Patrick Hutchinson en enregistrament de la TEMA VAP
fòto Amic Bedel