Alèra que n’i a que son a se rostir la coneda, cabirolar dins la nèu o ensajar de digerir la piòta e lo soc de nadal, la còla occitana de fotbòl afusta los crampons. Pas donc de trèva coma pels professionals, mas un tròç de causida al menut : l’isla de Man situada dins la mar d’Irlanda ambe mens de 100 000 estatjants. Aquò’s pel costat « exotic » per çò que costat fotbòl, aquela còla foguèt finalista de la ConIFA world cup de 2014 que se ganhèt una autra equipa occitana : la Selecioun del Countea de Nissa.
Los òmes de Daidièr Amiel que finiguèron 6en d’aquesta competicion (sens pèrdre de partida) auràn coma de costuma un cors d’occitan d’una bona mièja-orada de dabans d’anar prestir e sonsir lo terren e ausir un pauc de « Mannois », aquesta lenga celtica de l’isla de Man. Lo seleccionaire va menar 18 jogaires, amb un bon detzenat de novèls per far progressar l’equipa e obténer lo melhor nivèl possible. Cossí que siague, van aparar las valors occitanas. De jogaires que son pas mai los sols a portar las colors occitanas estant que 2014 vegèt l’espelida d’una còla femenina occitana.
La partida es a 6 oras del vèspre, dimars 30 de decembre, al TOAC, 20 camin de Garric a Tolosa. De d’aprèp, los Occitans faràn un pauc la fèsta quand mema al club house ambe de que manjar e de que dansar. Serà la darrèira partida de d’abans d’anar a la copa del monde de 2015 que se debanarà…a l’isla de Man del 13 al 21 junh ambe 12 equipas.
Reportatge complèt de seguir dissabte 3 de genièr dins lo Jornalet de França 3 a 7 oras un quart.
lo Benaset
