Se dis A Vòste e prepausa d’informacions localas e internacionalas en occitan sul web. Sas particularitats : es escrit en gascon e son director es un catalan sortit de Girona, passionat d’escacs.
N’avèm profitat per i pausar quauquas questions per nos presentar aquel siti novèl.
Jordi Camarasa Colomer, sètz nascut a Girona, sètz un Catalan ?
-Òc-ben ! Soi de Girona, trabalhi coma jornalista e coma corrector al jornal El Punt-Avui. Parli pas encara plan l’occitan mas aquest’an, l’apreni tot sol. Soi totjorn estant en contact amb l’occitan.
Alèra per de que un siti sonque en gascon ?
-Es una causida mas es pas un posicionament. Vòl pas dire qu’aquel dialècte es mai o mens importent qu’un autre, ni mai que se vòl diferenciar de l’occitan. Simplament, coma i aviá pas de siti en gascon, avem causit de ne far un.
Lo contengut es original, curiós, d’unas rubricas un pauc descaladas, (Bearn/Curiositats/Internacionau/Istòria/SèxeSciéncia/Television), lo gascon anava de parelh ?
-Volèm de causas un pauc diferentas. La basa son de novèlas curiosas. I a tanben de politica, e d’informacions localas. Mas avèm pas una redaccion sufisenta coma lo Jornalet e d’autres per anar sul terren e cobrir tot lo territòri. E lo gascon se petassa plan ambe de causas descaladas.
Presentatz nos l’equipa ?
-Pel moment sèm 3. Jausèp De l’Arriu e Éric Gonzalès, plan conegut en Gasconha, e que corregís los articles. E ieu que ne soi lo director. Mas lo nòstre projèct es dubèrt a tot lo monde de Gasconha. Es per aquò que se sona A Vòste.
Fòtos : Eric Gonzalés e Jausèp De l’Arriu
La debuta es encorajanta ?
Òc-ben ! La primièira setmana, avèm agut mai de 2300 pajas vistalhadas. Volèm publicar cada jorn, sonque de l’escrit, qu’avèm pas los mejans de far de video.
Benaset Roux
