Federacion Interregionau de Mèdias Occitans qu’es aquò ?
Benlèu que sètz legidors de La Setmana? Del Jornalet ? O alèra lo matin vos desrevelhatz ambe « Good Morning Occitània » sus Ràdio Occitània e País ? Mancatz pas las miègjornalas de Ràdio Lengadòc, los dessenhs animats sus Télé òc… Totes aquelses mèdias son recampats dins la FIMOC, Federacion Interregionau de Mèdias Occitans, un utis qu’exista dempuèi 2008.
De sitis internet e plan mai
Dempuèi quauques jorns, es ara possible de tornar escotar de cronicas escampilhadas a la ràdio o de fintar de reportatges e dessenhs animats passats al fenestron sus aquel siti. La FIMOC es tanben a l’origina de « Palanca », una platafòrma d’escambis entre aquelses mèdias. La tòca seriá d’arribar a apondre una agenciá de prèmsa occitana per aprigondir la preséncia de la lenga dins los mèdias. Pel moment Ràdio País, Vistedit/La Setmana, Ràdio Occitània, Ràdia Lengadòc, Conta’m, Paraulas en òc (Narbona), Lo Jornalet e Tévè Òc ne son membres. I a d’autres mèdias qu’utilizan aquela sorga e de partenaris associats tals coma lo Carnaval Biarnés o encara Accents du Sud, l’associacion que se maina del festenal Hestiv’òc.
Bona escota e bona legida !
Benaset
