Lo malhum Natura 2000 es un ensemble de sitis naturals europeus identificats per la riquesa de la lor fauna e de la flòra. Ensaja de conciliar aparament de la natura e pensaments socioeconomics. En Franca, 1758 sites son concernits. En 2002, l’Estat a prepausat d’instaurar un site Natura 2000 en Aubrac de Losèra. La question èra alèra : consi aquel malhum pòt fonccionar ?
Aubrac ©France 3
Aprèp un inventari faunistic e floristic de la region, mantuns airals d’Aubrac son estats retenguts en abitat flòra/fauna. La dinamic èra lançada. En Aubrac pas res se pòt far sens lo sosten del monde agricòl : lo projecte a recebut un accuèlh dels bons de la majoritat dels agricultors, força estacats a la lor tèrra e a l’elevatge extensiu tipic de la region. Las constrentas implicadas per Natura 2000 son minoras : en Aubrac demandan sonque una limitacion de la fertilisacion e una regulacion del nombre de vacas per ectara. La mejana en Aubrac es de 1,4 vaca per ectara, çò qu’es relativament faible. Aital, los parçans protegits representan ara mai de 25 000 ectaras. Aubrac es un país de ròcas, d’aiga e de sanhas per la maja part, los paisatges son encara aparats. L’agricultua tradicionala a permés lo manteniment d’una aiga pas poirida : la loira e l’escaravissa a pata blanca i son encara comunas.
La còla de Viure al País ambe Laure Andrieu ©France 3
L’operaitriz del malhum Natura 2000 en Aubrac de Losèra es la comunitat de comunas que recampa 16 comunas : Laure Andrieu n’es l’encargada de mission. Delà de son travalh de contact ambe los elevaires, Laure se tracha d’estudis scientifics sus las zonas naturalas del platèu coma, per exemple, las torbièras.
L’ensemble dels actors socials d’Aubrac son estacats a un biais tradicional de travalhar los espacis e lo malhum Natura 2000 permet tanben d’anticipar una arribada eventuala de l’agricultura intensiva. La creacion venenta d’un pargue natural regional permetrà d’afortir encara las mesuras de proteccion.
Aimeric Jonard
Tornaretz trobar lo reportatge dins « Viure al País » lo 26 d’octobre a 11o25.
