Calandreta deurà remborsar
La calandreta lemosina va dever tornar 47 000 euròs al Conselh Regional. E coma disiá l’autre : es pas una palha ! Dijòus passat lo tribunal administratiu de Lemòtges ordonèt lo remborsament d’aquel argent, en seguida d’una sasina per de ciutadans (d’unes son de « La Libre pensée ») en agost de 2012. Lo tribunal lor a donc donat rason en seguissent tanben lo raportaire public.
© France 3 Limousin
Un còp missant per aquela escòla qu’ aviá dubèrt en 94 dins lo barri Carnot de Lemòtges. La sola calandreta lemosina qu’aculhís un cinquantenat de mainatges a demandat al Conselh Regional d’escalonar lo remborsament. Dins una entrevista al jornal « Le populaire », lo president per interim de la Region Gerard Vandenbroucke diguèt : « Nous étions dans une démarche de soutien à une culture, à une pratique linguistique, cette polémique est bien inutile et c’est dommage ». Aqui un exemple de mai per los que pensan que las lengas regionalas son pron protegidas aital e qu’an pas besonh d’un estatut.
Reforma territoriala
Alèra que Lemosin s’aprèsta a s’abessonar amb Aquitània, França 3 Lemosin es anat veire Jean-François Vignaud per parlar de l’istòria e de la realitat de la lenga.
De voses e de vam
Per acabar sus una nòta lemosina gaujosa e plena de vam, vos aconselhi d’anar fintar aquel grop lemosin « Le Bal à la Voix ». De joves e jovas de Corrèsa que se dison « Lost in traditions » e que petan totas las convencions polifonicas e musicalas. Un mescladís plan vivificant d’escotar d’urgencia, de primièr deman divendres 10 d’octobre per l’after de la serada DETZ a l’estanquet de Tolosa.
Lo Benaset
