En 2000, Joan-Pau Becvòrt aguèt l’idèia de lançar un festenal occitan a Tolosa e dins las vilas a l’entorn ambe l’Institut d’Estudis Occitans. Sens cap de mejans mas amb una soscadissa darrer lo cap. Aquest’an, ne sèm a la 17ena edicion, 63 datas, 21 comunas que participan. Joan-Pau Becvort mena lo festenal non pas solet, mas i trabalha tota l’annada… E darrèr la manifestacion, i a un artista e quauqu’un que sosca al devenir de la lenga e de la cultura occitanas.
Jean-Paul Becvort
Photo : France 3
Joan-Pau Becvòrt artista
La flabuta per començar, puèi la guitarra, estudis sus las armonias, las compausicions, lo director del festenal Occitània a un percors artistic pron ric. Toquèt amb un crane guitarrista sudamerican, l’argentin Jorge Cardoso, encontret Javier Hinojosa, especialista de musicas ancianas, trabalhèt l’armonia amb Monic Ceconi-Botella, frequentèt l’IRCAM e joguèt las òbras de Maurice Ohana. Tant de noms que parlan als especialistas, mas sustot que fan que duèi, lo Joan-Pau a un nivèl a la guitarra fòrça interessant. Faguèt de scènas tanben, quitament amb lo Duo Marcabrú que menèt amb sa companha. Solide qu’aquò dona una legitimitat al moment de far una programacion.
La musica qu’escota
Jovenòt, sus sas platinas i aguèt los Pink Floyd, Brel, Brassens,Frank Zappa, Ferré, Barbara, Mercedes Sosa, Magma amb Christian Vander, Pierre Boulez o Karlheinz Stockhausen, … Bravament de musica de la Renaissença, de musica classica…Bach per la musica tonala, Monteverdi pel modal. E l’occitan me diretz? Tròba Moussu T excellent « se vei qu’a legit los trobadors ». Tanben lo 33T de Sicre e Loddo « Batèstas e cantariás », los Fabulous Troubadors. « I a d’intelligéncia amb Sicre qu’a una pensada abotida dens la compreneson del folclòr coma ligam social e non pas coma objècte de performància. » Cita tanben Laurent Cavalié que « sap revisitar lo passat ».
[
Sus las piadas de Castan e Lafont
Los parents de Joan-Pau vivián e trabalhavan a Paris mas anava de temps a d’autre a la campanha, en Chalòssa chas la mameta. L’equilibri vila-campanha. A Paris, encontra Fèliç-Marcèl Castan ambe Sèrgi Labatut qu’es duèi lo president de l’IEO de Tarn. « M’a noirit, ai legit sonses libres e aguèri l’astre d’anar cad’an a la Mòstra del Larzac e d’escambiar amb el… Considèri coma pertinenta l’idèia coma que la respelida passe notablament per las vilas. » Autre personatge que lo marquèt, Robèrt Lafont. Trabalhèt amb el sus l’Euròcongrès dins las annadas 2000. « L’un es complementari amb l’autre ».
Cal pensar global. Occitània es un aventura, una presa de risc e me soi pres al jòc
Se pòt dire que las pensadas de Castan e tanben un pauc de Lafont se tòrnan trobar dins lo festenal Occitània. Lo fait que siague un festenal per totes, dins totas las arts, mutualizat ambe de partenaris, sus mai d’una vila… « A la debuta, bravament de personas me diguèron que l’afar marchariá pas, quasi totes fòra de Castan e tanben Christian Grenet que se mainava de la sala de La Mounède de Tolosa. 17 ans pus tard, l’afar contunha. Aquò vòl dire que los concèptes son validats! ».
Lo festenal se debana duscas al 4 de novembre. Podètz anar fintar los nòstres « còps de còr » e tanben tota la programacion.
Lo Benaset @Benoit1Roux
