28 Jan

La Fédération des Pays Unis divisa

Un colectiu novèl de partits politics regionalistas se fondèt en genièr, la preséncia comuna de Bastir-Occitania e dels provençalistas de Prouvenço Nacioun pausa question.


Acamp de creacion de la Fédération des Pays Unis @LeFigaro

Perqué una novèla federacion de partits politics regionalistas e defensors de culturas minorizadas? Perqué dins aquela novèla federacion s’i tròban a l’encòp d’occitanistas e de provençalistas – qu’afirman que lo provençau es una lenga diferenta de l’occitan? La Fédération des Pays Unis, nascuda lo 15 de genièr passat, interròga. Aquel colectiu es compausat, per ara, de 5 formacions: lo Parti Breton, lo Parti Lorrain, Prouvènço Nacioun, los Bascos d’ENJ-PNB e doncas Bastir-Occitania*. De formacions que revindican l’autonomia de las regions, una organizacion federala en França e que defendon las lengas minorizadas dins aquel país. E que precisèron tre la fondacion, que lor federacion es pas facha contra aquela qu’existís dempuèi las annadas 90, « Régions et peuples solidaires » (RPS): alara que RPS es engajada a esquèrra, los membres de la FPU « refusan d’èsser embarrats dins lo debat esquèrra-drecha, franco-francés », segon lor pòrta-paraula Alan Guarino, qu’es tanben president de Prouvènço Nacioun. Del costat de Bastir-Occitania nos foguèt precisat que lo Partit Occitan, membre de RPS, s’opausèt a l’entrada de las autras formacions occitanistas dins la federacion (coma lo Partit de la Nacion Occitana o precisament Bastir) e qu’en Bretanha, l’Union Democratica Bretona auriá tanben enebit l’adesion del Partit Breton. Joan-Luc Davezac, que signèt la carta de creacion de la FPU per Bastir-Occitania, explica que d’unes membres coma lo Parti Lorrain « son de centre drecha », d’autres coma el « de centre esquèrra », e que la tòca es « de cobrir tot lo terren, per que totes los regionalistas pòscan integrar la batalha ». Davezac apond que los Provençaus eles insistisson sul fach que son pas de ges de bòrd. La pagina d’acuèlh del siti de Prouvenço Nacioun o confirma, lo partit se declara « ni de drecha, ni d’esquèrra, nimai del centre ».

Aligança contra-natura?

Cò qu’es reprochat a Prouvènço Nacioun es efectivament pas un engajament politic, mas una ostilitat recurenta e mantenguda contra l’occitanisme. Lo fach de veire aquel partit amb Bastir Occitania faguèt reagir los occitanistas de Provença. L’Ostau dau País Marselhés publiquèt un comunicat diluns 24 de genièr, denonciant « una aliança vergonhosa ». Membre de l’associacion, Matieu Castel descriu Prouvènço Nacioun coma « dubertament anti-occitanista ». « Demandan que siegue enebida la grafia occitana, diguèron de pas votar per la lista Òc per Provença a las regionalas en rason de la preséncia d’occitanistas – alara que lo programa parlava sonque dau provençau. E puèi que considerèsson qu’es una autra lenga es una causa, mas demandar que siegue enebida es de racisme; coma se demandavan d’enebir d’escriure l’arab. » En furgant se trapan de publicacions que tradusisson aquel « anti-occitanisme »: un reportatge de TF1 que parla de l’occitan en inclusent Provença es « un desonnor », una publicacion de l’IEO-CREO Provença es presentada coma « una propaganda que lordeja la lenga provençala », o encara una ataca d’Alan Guarino contra lo Partit Occitan que « defènd un plan óucitan gloubau que trasformo lis identitats en simpli federacioun d’uno entitat supranaciounalo counceptualo emé pèr ambicioun de nourma di lengo plurielo dins un estandard unique designa souto lou voucable d’óucitan ». Per Joan-Luc Davezac, « l’important es de parlar la lenga e de balhar de poder a las regions per que las regions balhen de poténcia a la lenga ». L’ex cap de tièra de las regionalas 2021 precisa qu’Alan Guarino se definís coma « regional, per un França federala dins una Euròpa federala ». Autre membre de Bastir-Occitania, Joan-Pau Laval afirma que « caldrà parlar d’aquela question » e ajusta qu’un acamp en prevision de las legislativas se tendrà au mes de febrièr amb lo Partit Occitan e lo Partit de la Nacion Occitana. Dins lo comunicat de l’Ostau dau País Marselhés, « l’union politica de dos moviments: l’un occitanista, l’autre anti-occitanista » es vist coma « una bela galejada ». Per Matieu Castel, aquela union èra impossibla per part dels provençalistas quand lo nom d’Occitania remandava pas a una region administrativa. « Ara, se pòdon aligar amb un partit occitan que defend sa lenga dins sa region ».

Objectiu: legislativas

La Fédération des Pays Unis s’es doncas bastida a l’encòp en rason de la « barradura » de RPS e de divergéncias de posicionament (emai se lo partit basco ENJ-PNB es membre de las doas federacions); una aligança que Joan-Pèire Laval vei sus « de basas mai democratas-centristas ». E se bastiguèt tanben en 2022 perqu’arriban las eleccions legislativas, « las solas eleccions que rapòrtan » reconéis Joan-Luc Davezac. La tòca de la FPU serà de capitar d’aver mai de 1% de las votzes per al mens 50 de sos candidats, e atal de reçaupre un finançament public. « Serián de mejans financièrs que permetriàn d’aver mai de poder d’accion e de preparar las europencas » contunha Davezac, qu’apond esperar « 150 candidats » pel mes de junh e que de discutidas son en cors amb de partits d’Alsàcia e de Catalonha per los integrar a la FPU.

 

*Dempuèi lo mes de decembre passat, l’organizacion Occitania-País Nòstre repartiguèt sas activitats: l’accion politica per Bastir-Occitania, mentre que l’accion culturala e economica demòra a Occitania-País Nòstre.