La dimenjada passada foguèt de las rufas. En 3 jorns, aprenguèrem 3 despartidas, aquelas de Gui Cavagnac, Pèire Boissièra e Geli Grande. Cadun d’entre eles foguèt a l’encòp un actor culturau (escrivan, musician, realizator) e un militant, tant dins d’associacions coma en politica. Un omenatge lor serà rendut deman de sèr, dissabte 15 de genier, dins lo jornalet d’informacions de França 3. Abans aquela difusion, vos prepausam de descobrir d’archius qu’avèm trobats dins lo catalòg de l’INA.
A l’encòp cantaire, compositor e autor, Pèire Boissièras èra tanben un collectaire, una vertadièra biblioteca de cançons e contes popularis. Un repertòri vengut de son parçan dau naut agenés, mas un repertòri tanben fornit en d’autres dialectes. Aquelas coneissenças, las partajava, notadament, cada an dins l’encastre de l’Escòla Occitana d’Estieu a Vilanuèva d’Òlt. Es aquel aspect qu’es abordat dins un reportatge de 2007, per Clamenç Alet.
Per descobrir mai precisament l’òme e son país, au quin èra mai qu’estacat (foguèt conse de son vilatge), una passejada facha en 2003 amb Aymeric Jonard.
Gèli Grande èra el tanben dau país agenés. Militant acarnassit dempuòi mai de 40 ans, se lo trapava pertot ont un eveniment valorisava l’occitan. Co-president dau Partit de la Nacion Occitana (P.N.O.), èra tanben poèta, autor d’un recuèlh « Puntas de roge ». Lo trobam dins la video seguenta per parlar d’una autra figura agenesa, Jansemin, amb Sirine Tijani.
