2022 marca los 10 ans de Jornalet.com, primièr siti d’informacion tot en òc. Ferriol Macip Bonnet n’es lo cap-redactor e fondator.
Jornalet.com aurà lèu 10 ans : aquò se festejarà ?
Seriá estat plan polit d’organizar una bona fèsta, mas d’un costat avèm pas d’argent – Jornalet subreviu coma pòt – e de l’autre costat i a la covid. Doncas, se faguèt una amassada amb qualques legeires e se decidiguèt que localament seràn organizadas divèrsas seradas. E atal festejarem l’anniversari de Jornalet long de tota l’annada e sus tot lo territòri de lenga occitana. Ja avèm demandat de participar a l’Estivada de Rodés o a la corsa d’Aran per la lenga e voldriam anar tanben al festenal de Saurat. De mond se prepausèron per far quicòm en Gironda, Bearn, dins Aude, en Provença, a Tolosa… E avèm lançat un sondatge en linha per que lo mond nos digan de quina region son e coma aquò, los legeires d’un meteis canton se podràn conéisser e s’amassar per organizar de seradas.
Las dificultats financièras son regularas per Jornalet. Ont ne sètz a l’ora d’ara ?
Coma tostemps, Jornalet subreviu gràcias a una petita subvencion de la Generalitat de Catalonha, en sosten a las activitats en occitan, gràcia als dons dels legeires e a tot l’argent que recampa l’associacion dels Amics de Jornalet. Es un miracle, mas avèm tengut lo còp fins a 10 ans. Sabèm pas se durarem o non, pel moment pòt tenir. Sembla qu’aurem de publicitats per part de l’OPLO e de la comuna de Tolosa. Se nos arriba mai de publicitat, tant melhor, si que non raubarem d’oras a la familha o al sòm.
I a un contraste entre las dificultats de Jornalet e son importància : es vengut lo siti de referéncia d’informacion en òc.
Aquò nos pòrta una granda responsabilitat. Fasèm çò que podèm, al nivèl jornalistic es pas una meravilha, es pas lo melhor mèdia que siá. Sèm venguts una referéncia perque n’i a pas d’autre. E benlèu perqu’es lo sol esplech que far viure l’occitan cada jorn. Cal dire qu’avèm un jornal de referéncia, Villaweb, en catalan. Es el que nos ajudèt a créisser e que nos manda de materials o d’informacions quand avèm res a publicar : nos ofrís son contengut a gratís per qu’òm l’adapte en occitan.
I a pas d’autre mèdia atal tanben perque sètz los sols a vos motivar d’o far.
Jornalet es un jornal collaboratiu : la redaccion es centralizada a Barcelona, ont m’arriban de nòvas de tot lo país, la correccion linguistica se fa a Pèiralatas dins lo Daufinat e los audios son registrats cada jorn en Peiregòrd. Las novèlas tecnologias nos permeton de far aquel miracle, mai que mai en occitan, Occitania es un país talament grand. E puèi, i a de mai en mai de collaboracion amb los legeires : los opinaires que fan d’articles coma aqueles que mandan las nòvas.
En 10 ans, quinas foguèron las evolucions importantas ?
La version de papièr, mas sèm a analizar se la contunham o pas. Nos demanda tròp d’esfòrces e sabèm pas s’es pron presada. Dempuèi un an, avèm la version sonòra dels articles. E en 2022, anam inaugurar lo novèl siti web, que fa mai d’un an que trabalham dessús.
