24 Oct

Anullacion de Trad’Envie de 2020

« Renonciam ! » Lo director del festenal Alain Laporte aurà tot fach per ensajar de salvar l’edicion de 2020 de Trad’Envie, lo festenal de las musicas, dels cants e de las dansas tradicionalas d’Occitania e d’endacòm mai que se deviá debanar a Pavia dins Gèrs del 29 al 31 d’octobre.

Mas l’endurciment pel prefècte de las condicions sanitàrias ièr de matin amb en particular l’interdiccion de manjar e de bèure tuèron los darrièrs espèrs. « Faguèrem l’esfòrç de nos equipar, de tot preparar per aculhir lo public dins las melhoras condicions amb de gèl idroalcoolic, de masquetas a l’efigia de Trad’envie, una circulacion bilingüa… Mas, ara, podèm pas pus seguir. »

Caquelà, lo festenal aviá pas jamai agut tant de reservacions e de pre-vendas que seràn remborsadas plan segur. Per las despensas engatjadas, lo festenal pòt comptar sul sosten financièr de la Region, del Departament e de la Comuna de Pavia (32).

Photo Emilie Castagné

E la seguida ?

Jà remés un primièr còp (del mes de mai al mes d’octobre), lo festenal deguèt tot repensar un còp de mai a causa de l’impossibilitat d’organizar los balètis e trad’aperòs. « Era la tresena remòlta de 2020. Renonciam per ongan. Ara, anam cabussar dins los comptes, acabar 2020, nos repausar e soscar per l’an que ven ». En 2021, l’associacion Trad’Envie celebrarà sos 30 ans : « Pensam de far quicòm dins la durada, benlèu sus l’annada tota. Lo festenal es pas mòrt, vos asseguram que festejarem lo nòstre anniversari en 2021 ». Lo rendètz-vos es pres.