La societat qu’edita lo jornal La Setmana e las revistas joinessa Papagai e Plumalhon dempuèi 23 ans pausa la question de sa disparicion en una del seu setmanièr e designa lo responsable : L’Ofici Public per la Lenga Occitana (OPLO).
Dempuèi mai d’un mes las doas institucions se parlan pas que per comunicats. L’afar fa grand bruch pel monde occitan, aquelas publications an una dimension simbolica : AICI
L’emocion e la vivacitat dels sostens amagan pas la baissa constanta dels abonaments. La situacion delicata de la societat d’edicion era coneguda dempuèi bel briu, lancèt mantun còps de cridas a la solidaritat. Subreviviá dempuèi qualques annadas mercés a de partenariats e mutualizacions ambe notadament Radio País, la Federacion Interregionala dels Mèdias Occitans (FIMOC) e i a pas gaire ambe LoJornalet.com.
“ Nada ajuda en 2018”
Dins son edicion del 27 d’abril, la còla de Vistedit publiquèt una letra dobèrta que butassèt sos lectors pr’amor qu’apelèt “l’Ofici Public de la Lenga Occitana a tornar sus la soa decision de non pas acordà’u nada ajuda en 2018”.
Se La Setmana es a viure de sos abonaments e de publicitat, las publicacions joinessa son dependentas de la subvencion de l’Ofici. La fin de l’ajuda segon Vistedit acabarà la publicacion de Plumalhon e Papagai, amai aflaquirà tant l’estructura que La Semana s’atudarà tanben.
« Dens un país on la premsa ei sostienuda de faiçon importanta, non pas recéber nada ajuda d’un organisme dont l’objectiu ei de donar mei de visibilitat a la lenga occitana, que’ns questiona. L’organisme cargat de méter en plaça ua politica tà l’occitan imagina qu’aquò se harà shens nat jornau e revista ?” demanda Vistedit totjorn dins l’edicion del 27 d’abril.
“Arriban pas a trobar lor public”
Los jorns venents suls internets e dins La Setmana del 11 de mai, las reaccions ostilas a l’OPLO plòvon. Dins son editò a la una del setmanièr Andriu de Gavaudan acusa : « Aqueles gents que, plan installadas e pagadas amb la moneda publica regionala, aurián un drech de vida e de mòrt sus de monde [ ] amb una paga indigenta”.
D’artistas an mandat de letras de sosten coma Eric Fraj que parla d’una decision “irracionala” o Felip Espinasse qu’apèla “au bon sens, a l’etica e a l’arrespècte deu tribalh hèit”.
Es dins un ambiant de mesfisança recipròca que Vistedit publiquèt 28 de mai la responsa de l’OPLO e sa quite responsa a la responsa.
OPLO
Per l’Ofici aquela causida « foguèt faita aprèp lo constat d’una manca de reactivitat de Vistedit en seguida de mantuna temptativas d’acompanhament prepausadas per las regions çò primièr puèi per l’Ofici Public de la Lenga Occitana per sortir la societat de sas difficultats”. Puèi apondèt que “las revistas pels mainatges arriban pas a trobar lor public malgrat una aumentacion regulara del nombre de dròlles en capacitat de las legir.”
Per son comunicat, Vistedit se vòl mai que sceptic quant a la responsa e las intencions de son entreparlaire, mas se ditz a “disposicion per trapar al pus lèu una solucion”.
“Una fasa intensiva de concertacion”
Aquela empunhada a còps de letras dobèrtas fa lum de l’estat de las relacions e de la comunicacion fins ara entre las doas estructuras. Mas una mena de dialòg sembla tornar prene, l’OPLO daissa una porta dobèrta : “Se deviá aver un impacte indirècte sus La Setmana, l’Ofici es prèst a estudiar de solucions alternativas”. Aqueste estudi se farà al dintre d’una brava soscadissa sul modèl de finançament e de desvolopament del mèdia occitan ambe los actors del sector que l’Ofici aprèsta per l’estiu, promet “una fasa intensiva de concertacion”.
Lo 28 de mai, jorn de la responsa de l’Oplo, Ràdio Lenga d’Òc diguèt per la votz del seu director Bruno Cecillion que se deplorava la decision de copar la vitalha a Vistedit, se regaudissiá de la concertacion a venir: “Es l’escasença de tornar lançar de cridas per dire mèfi ! I sèm aquí en dificultat, las situacions son de còps equilibradas, mas la mendre manca nos met en difficultat, res es pas ganhat”.
Aquò sufirà benlèu pas per salvar Vistedit que serà recebut per l’Ofici lo 7 de junh, mas lo resson d’aquesta crisa en çò del monde occitanista farà de segur cambiar de dralha lo mèdia occitan. Una remesa en question serà necessària tant los mèdias occitans son fragiles.
Malgrat mantuna demandas d’entrevistas, la direction de Vistedit volguèt pas respondre a las nòstras questions. Alavetz, vos prepausam de descobrir l’entrevista de Charline Claveau-Abbadie, presidenta de L’OPLO, facha dijòus 31 de mai :
@Guillaume Gratiolet
