Viure al País – Amb Jacqueline e Christiane pel causse de Limonha
Coproduction Piget / France Télévisions
Lo pastís : cadun son biais, sa recèpta e que sovent, demòra secrèta. Cò que podem dire es que ven de pastís (mescla de mai d’una causa en occitan) e qu’a donat pastissariá en francés. Pastissar en òc vòl dire trabalhar amb las mans, chaupinar…
De pastís s’en tròba en Carcin mas tanben en Gasconha. De còps se parla de crostada (mas es quicòm mai) o tanben de tortièra (dins las Lanas). Aquí Piget es anat sul causse de Limonha (Òlt) per veire lo famós pastís « anguila » ont nos espèran Jacqueline la maire e Christiane la filha.
Se fa dins un lençòl per i donar sa fòrma de sèrp, d’anguila. Pas plan luènh de Limonha, se dís tanben « Crostada al cabeçal » a Cailutz.
Dins aqueste país de secada e de pèiras, òm sap trimar mas tanben passar de bons moments. Aital aquesta còca tarribla, autant biaissuda que gormanda : lo pastís.
De biais, ne cal per espandir finament la pasta. Per i metre çò que cal un còp estirada : quauquas pomas mas tanben un pauc d’aiga benesida, de riquiqui coma disiá l’autre. Cada canton i met de sa liquor; en Carcin seriá d’aigardent.
Per la recèpta, se pòt trobar en occitan, en francés…mas tanben en inglés.
Questions de lengas, òm pòt relevar que la Jacqueline dís « un bocin d’oliva » per dire un pauc dòli. I d’autras causas encara de descobrir sus aquesta còca plan savorosa e totes los biaisses que cal per se far petar la ventresca ! Lo reportatge passarà dimenge dins Viure al Pais
Lo Benaset
